Google Street View Nunatsinni atugaalissagunarpoq

Nunamik uuttortaasartut Nuummi Asiameersut Google-imi atorfilimmik Californiameersumik isumaqatigiissummik ulluni makkunani atsioqateqarnissartik pilersaarutigaat, qanorlu isumaqatigiissuteqartoqarnera apeqqutaatillugu, imaassinnaavoq illoqarfiit nunaqarfiillu arlallit Google-ip atortorissaarutai atorlugit assiliortorneqartut. Illoqarfiit nunaqarfiillu taamaalillutik internetikkut "tikeraarneqarsinnaalissapput".

- Google-imut isumaqatigiissutip sapaatip akunnerani matumani tullianiluunniit atsioqatigiissutiginissaa pilersaarutaavoq. Assiliisaqattaarnerup ulluinnarni sulinitsinni ilaatinneqarnissaa pilersaarutaavoq, taamaalillutalu ukiut arlaqanngitsut qaangiuppata illoqarfiit nunaqarfiillu tamangajaasa nittartakkamut Google Street View-imut ilanngussinnaalissavavut, Eva Mätzler Asiameersoq oqarpoq.

Taamaallaat biiliminngaanniit assiliisaqattaartoqassanngilaq, naak nunarsuatsinni nunani allani taamaaliortoqarnerusaraluartoq. Google-imut isumaqatigiissutissap inissaqartitsinissaaa apeqqutaatillugu biilit, umiatsiat, qamuteralaat, qimussit nammattakkallu assiliivinnik siumut, sanimut tukimullu annertussusilinngorlugit assiliisinnaasunik assiliivilersorneqassapput.

Asiaq nammattakkamit Google-imut assiliisinnaassappat, Nunatsinni qaqqat ilaat aamma illoqarfinnit nunaqarfinnillu timmut aqqutit majuartarfiillu nunap assingani ilaasinnaanissaat Eva Mätzlerip neriuutigaa.

Suliniut pineqartoq ukiuni arlalinni suliassaassaaq. Piviusunngortinneqassappallu nuna tamakkerlugu assiliisaqattaarnissamut Asiaq ikiortissarsiortariaqassaaq. Siunnersorti Google-imeersoq atortut qanoq atornissaannik ilitsersuussisussaq juunimi Nunatsinniissaaq.

Google qamuteralaat atorlugit Sikuiuitsumi Kujallermi siusinnerusukkut uuttortaallunilu assiliisaqattaareerpoq. Google-ip assiliivii siumut, sanimut tukimullu annertussusilimmik assiliisinnaasut 20 kiilut missaannik oqimaassuseqarput.