GMM: NunaMineralsip ingerlaannarnissaa pingaaruteqarpoq
Aatsitassarsioqatigiiffiup ingerlaannarnissaa pillugu tuluit aatsitassarsioqatigiiffissuata, Patric Newmanimit pigineqartup, Greenland Mining Managementip, GMM-ip NunaMineralsillu akornanni isumaqatigiinniarnerit, ukioq manna maajimili aallartipput.
NunaMinerals A/S soqutiginartuusoq aammalu ingerlaannarnissaanik periarfissinneqassasoq, GMM-ip eqqartuussissuserisuata danskiusup eqqartuussisulerisunit Plesnerikkunni piginneqataasup, Ulrik Holsted-Sandgreenip KNR-imut oqaatigaa.
- GMM isumaqarpoq NunaMinerals soqutiginartuusoq. Tamannalu tunngavigalugu suli piginneqataasunut neqerooruteqarpugut piginneqataassutimik 15 procentii pigiinnarsinnaagaat uagullu aatsitassarsioqatigiiffiup piginneqataassutaasa 85 procentii pigilissagigut taamaalilluta 10 millionit koruuninik ileqqaagaqassalluta, GMM-ip eqqartuussissuserisua, Ulrik Holsted-Sandgreen oqarpoq.
Aamma atuaruk Aviisi: NunaMinerals USA-mi aatsitassarsiorfinnik ingerlatsissasoq
NunaMineralsip ingerlaannarnissaanik ujartuinerit pereersullu, aatsitassarsioqatigiiffik maajimi aalajangerpoq akiliisinnaajunnaarnermik nalunaaruteqassalluni. Tamatumalu kinguneraa piginneqataassuteqartut ilaatigut Namminersorlutik Oqartussat 4,5 millionit koruuninik akiitsoqarfigineqalerneri.
GMM-imik isumaqatigiinniarnerit pillugit, Siulittaasup naalakkersuisoqarfiani pisortaaneq, Søren Hald Møller maanna oqaaseqarusunnani KNR-imut oqarpoq. Aatsaalli GMM-ip akiliisinnaasusia Nunatta Eqqartuussiviata aalajangerneqareerpat oqaaseqarsinnaanerarpoq.
Aamma atuaruk Kisitsisit NunaMineralsip akiliisinnaajunnaaneranut tunngasut saqqummiunneqarput
GMM-ip Namminersorlutik Oqartussanut isumaqatigiinniarnerani aningaasat 4,5 millionit koruunit eqqartorneqarsimasut, Ulrik Holsted-Sandgreen oqarpoq.
- Aap, taakku aamma eqqartorneqarput. Kisianni NunaMineralsip ingerlaannarnissaa eqqarsaatigalugu aningaasat taakku isumaqatigiinniarnermi qitiutinneqarnersut imaluunniit allanik tunngaveqartoqarsimanersoq, Namminersorlutik Oqartussat kisimik akisinnaavaat. Taakkulu aperisariaqassavatit, Greenland Mining Managementip eqqartuussissuserisua, Ulrik Holsted-Sandgreen KNR-imut taama oqarpoq.
NunaMineralsip ileqquusumik ataatsimeersuarnerani siulersuisunut ilaasortassat nutaat toqqarneqarput. Taakkulu tassaapput Tuluit Nunaanneersut Allan Bigger aamma David Winduss aammalu australiamiu Chris Williams.
