GME-p avatangiisinut sunniutaasinnaasunik misissuinini naammassigaa
Kuannersuarni aatsitassarsiornissap akuerineqarnissaa qanilliallaqqippoq.
Atuisinnaatitaanissamut misissuinissat GME-p maanna naammassisimalerpai, suliffeqarfiup neriuutigaa sivisunngittoq qaangiuppat taakku tunngavigalugit aallartissinnaassalluni.
Avatangiisit sunnerneqarsinnaanerannut nalilersuinerit naalisarlugu VVM, aammalu inuiaqatigiit eqqarsaatigalugit piujuaannartitsinissamut sunniutigisinnaasaanik nalilersuinerit naalisarlugu VSB maanna Namminersorlutik Oqartussanut tunniunneqareerput.
VVM suliffeqarfimmit Orbiconimit ingerlanneqartoq, VSB-mik suliarinnittuuvoq Niras.
Misissuinermi angusat misissorneqassapput
Alloriarneq tullinnguuttoq tassaavoq nalunaarusiat Namminersorlutik Oqartussanit nalilersorneqarnissaat.
Avatangiisinut tunngasortai ilisimatuunit DCE-meersunit Pinngortitaleriffimmiillu nalilersorneqassapput, Inuussutissarsiornermut Naalakkersuisoqarfiup VSB inatsisinullu tunngasut misissorumaarai.
Aamma atuaruk VIDEO Uranisiornermi aarlerinaataasinnaasut geokemikerip nassuiaateqarfigai
Nalunaarusiat misissorluarneqareerpata amigaataasinnaasullu ilanngussorneqareerpata, tusarniutigineqarnissaminnut piariissapput.
Nunatsinni suliarineqassapput
GME-p nalunaarummini erseqqissarpaa, Namminersorlutik Oqartussat kissaatigisaat malillugu assigiinngitsunik marlunnik siunnersuusiorsimallutik, tassani pineqarlutik uran aamma saffiugassat qaqutigoortut, Kalaallit Nunaanni akuiaavimmi immikkut ittumi suliarineqarnissaat.
Atortussialerineq taanna avatangiisinut annertuumik unammillingassartaqarpoq, aammali sulisussat akileraarutitigullu isertitassat eqqarsaatigalugit nassataqarnerussalluni.
