GME misissueqqeqquneqartoq

Tamatumunnga pissutaavoq ingerlatseqatigiiffik Greenland Minerals and Energy - GME - qinnuigineqarsimammat atuisinnaanermik qinnuteqannginnermini avatangiisinut sunniutissat pillugit misissueqqinnissamik. AG taama allaaserisaqarpoq.

Avatangiisinik aqutsisoqarfik AG-mit oqaloqatigineqarsimavoq, taakku sivisuumik pisaq pillugu nipangersimasimariarlutik nalunaarsimapput avatangiisit pillugit GME'p nalunaajaataa nutaanik ilaartortariaqartoq piiaavimmit pujoralaat avatangiisini tatsinut imaanullu qanoq sunniuteqassanersut pillugit, eqqakkallu sumut inissinneqassanersut qanorlu avatangiisinut akulerutissanersut, AG allappoq.

Avatangiisinut sunniutissai pillugit GME'p suliai pillugit marsi qaammataagaa avatangiisinik illersuiniaqatigiiit arlallit qisuariaatitut tamanut saqqummiuppaat Namminersorlutik Oqartussat avatangiisit pillugit sunniutissat pillugit tusagassiuutit paasissutissanik tamakkiisumik allakkatigut paasissutissinneqarusussimanngimmata.

Avatangiisit pillugit GME nalunaarusioreerpat tamanut ammasumik tusarniaassutigineqassapput. Naggataagut Naalakkersuisut GME'p qinnuteqaataa akuerisussaavaat - naalakkersuisoqatigiillu partiit angisuut marluk Siumut Inuit Ataqatigiillu - tamanna pillugu assut isumaqatigiinngissimapput.

Inuit Ataqatigiit siulittaasuat Sara Olsvig, Naalakkersuisullu siulittaasuannut tullersortaasoq oqarsimavoq uranitalinnik piiaanngilluinnarnissaq aalajangiusimallugu GME-llu pilersaarutaa inatsisinilluunniit malinnikkaluarpat akuererusunnagu.

Siumulli Naalakkersuisullu siulittaasuat Kim Kielsen akerlianik silatusaaqqusilluni erseqqissaasimavoq GME uranisiornissamik qinnuteqaqqissappat Naalakkersuisut inatsit malikkumaaraat oqarsimalluni.

AAMMA ATUARUK Uranimut akerliusut aatsitassalerisussanngorput