GM-ip ulluani siullermi målernerpassuit
Pissartanngorniunnerni unammeqqaartuupput pissartanngorniunnernik aaqqissuisoq Kugsak 45 aamma SAK, unamminerlu taanna ippassaq unamminerni pissanganarnerpaavoq.
SAK-miut Sisisimiuneersut, pissartanngorniunnerit aallartinnissaat sapaatit-akunneranik sioqqullugu peqataasussanngoriasaartut, unamminermi akiuulluarput. Unamminerli 1-0-mik inerneqarpoq Kugsak 45 ajugaalluni, naak Kugsaap anføria marloriarluni mianersoqqussummik nittaavigineqareerluni anisitaagaluartoq.
AAMMA ATUARUK Angutit inersimasut isikkamik arsaallutik Nunatsinni pissartanngorniunnissaat ullumi aallartissapput
Pissartaasut takutitsilluarput
Nunatsinni pissartaasut B-67 T-41 ajornaquteqanngitsumik 3-0-mik ajugaaffigaat, Malamummiut G-44-mit ilungersortitaavissorput 5-0-mik ajorsartitaallutik, ullormullu unamminerit kingullersaanni K-33-miut Nuummiunut IT-79-imut ajorsarujussuarput. IT-79-miut K-33-miut inuusukaajunerusunik unammisartoqartut 5-1-mik ajugaaffigaat, aamma K-33-mi anføri unamminerup immikkoortuani siullermi anisitaavoq.
Pissartanngorniunnerit ullumi nalunaaqutaq ataatsimut nanginneqassapput, unammisussallu tassaapput Kugsak aamma FC Malamuk, T41 aamma K33, SAK aamma G44, Nuummeersullu B-67 aamma IT-79 unnugu nalunaaqutaq arfineq-marlunut unammissapput.