GM-imut soqutiginnittorpassuit

Illup iluani arsaannermi angutit GM-qarnissaannut iligiit 29-it nalunaarput. Unammersuarnerilli naggataarneqarnissaannut iligiit 16-it taamaallaat inissaqarput.

- GBUp siulersuisui unammersuarnermullu ataatsimiititaliaq tamassa aaqqiissutissamik ujarlileruttorput. Mellemrunde-qarnissaq siornatigut eqqartoraluarparput kisianni angalaniarneq akisuallaalissaaq. Illoqarfikkaartumik anngunniunnissaq periarfissaasinnaavoq, GBUp siulittaasuata tullia John Thorsen KNR-imut oqarpoq.

Aaqqiissutissamik nassaarniarluni tamassa ataatsimeeqattaarnerit pileruttorput. Nalunaartut tamarmik peqataatinneqassata iligiit avataaneersut 20-it sinnillit tamarmik inissaqartinnissaat qularnarluinnarpoq. Taamaammat peqataasinnaasut amerlanerpaaffissaannik GBU killiliisariaqalerpoq illup iluani arsaalluni GMip Nuummi marsip naalernerani ingerlanneqarnissaanut.

Arnat illup iluani arsaallutik GM-qarnissaat Ilulissani marsip naalernerani pissaaq tassanilu aamma iligiit peqataasinnaasut 16-inut killilerneqarnikuupput. Nalunaarnissamulli killigitinneqartoq 31. januar nallermat iligiit 18-it nalunaarutigineqarsimapput.

- Naatsorsuutiginngilarput peqataasut pilersaarutaasumit marlunnik amerlaneruppata tamatuma annerusumik ajornartorsiutaanissaa, John Thorsen oqarpoq.