GM aaqqissuisussarsiulerpaat
- Aappaagu pissartanngorniunnernik aaqqissuijumasut arlallit nalunaareerput, kisianni kikkuuneri nalunaarutigisinnaanngilakka suli qinnuteqarnissamut killigititaasoq naanngimmat, GBUp siulittaasua Lars Lundblad KNRimut oqarpoq.
SAK Sisimiuneersoq angutit inersimasut pissartanngorniunneranni ukiormanna aaqqissuisuuvoq arnat pissartanngorniunnerat T-41-p Aasianni aaqqissuukkaa. Maanna aappaagu aaqqissuussiniartut qinnuteqarfissaq kingulleq oktoberip qulingani pisussanngorpoq.
- Assut pitsaassagaluarpoq illup iluani pissartanngorniunnerit qeqqani ingerlanneqarsinnaappata taamaasilluta akikinnerpaaq nassaarisinnaassagatsigu, Lars Lundblad oqarpoq.
Illup iluani pissartanngorniunnerit februaarimi marsimiluunniit pissapput. Meeqqat angajulliit silami pissartanngorniunnissaanni aaqqissuisut aalajangiissapput unammersuarnerit qaqugu pissanersut.
Angutit inuusuttut pissartanngorniunnissaat juulimi aggustimiluunniit pissaaq, taamatuttaaq arnat inuusuttut, arnat inersimasut angutillu inersimasut pissartanngorniunnerat juulimi aggustimiluunniit pissapput.
