GIF aamma OL-imukassaaq
Danmarkimi Timersortartut Kattuffiat, Dansk Idræts Forbund, kalaallit OL-imi aallartitaqarnissaanik inissanik marlunnik immikkoortitsimavoq.
Kalaallit Nunaanni Timersoqatigiit Kattuffiata GIF-ip OL-imut aallartitai tassaapput Riikki Biilmann aamma Ole Kielmann Hansen, taakku aqagu ullaakkut London-imut tikissapput.
- Aaqqissuussinermik annertuumik OL-itut ittumik ingerlatsineq ilikkagaqarfiginiarlutigu OL-eqarnerani London-imiissaagut, Ole Kielmann Hansen oqarpoq.
- OL-imik aaqqissuussinerit soorunalimi annertoorujussuupput, taamatullu annertutigisunik nunatsinni aaqqissuussisoqarnavianngilaq. Neriuppugut soorlu issittormiut unammiuaarnerisa, Arctic Winter Games-it, qeqertarmiullu unammiuaarnerisa, Island Games-it aaqqissorneqartarnerannut atorsinnaasatsinnik ilikkagaqarumaarluta, Kielmann oqarpoq.
Ole Kielmann Hansen neriuppoq savalimmiormiu naluttartoq Pal Joensen naapissallugu. Pal Joensen Danmark sinnerlugu OL-imi peqataavoq.
Pal Joensen Savalimmiuni naluttarfimmi Nuummi naluttarfittut Malik-tut angitigisumi ulluinnarni sungiusartarpoq.