GG-mi ilusilersuisoq: Puisit amii soqutigineqaleraluttuinnarput
Puisillu amiinik EU-mut eqqusseqqusinnginnerup oqallisigineqangaatsiarnerata kingorna ingerlatsiviup ilusilersuisuunera puisip amiinut soqutiginnileraluttuinnarneq malugisimavaa.
- Atisanik takutitsigaanni nutaaliorsimalluni, soorlu soraarummiiginnarluni, Great Greenlandimi ilusilersuisuuneq, Jesper Høvring, Great Greenlandip ukiaru pisiassaatigisassaanik pingasunngormat takutitsisoq oqarpoq.
Aamma atuaruk EU-p puisit amii pillugit paasititsiniaanera danskit politikeriinit isornartorsiorneqartoq
Puisit amiinik pisinniarfinni amerlanerni tunisaqalernissaq ukioq kingulleq anguniarneqarsimasoq assigalugu ukioq manna anguniagaavoq. Tamannalu anguneqarsinnaavoq tassami Danmarkimi puisit amiinut isummersortarneq ukiut ikittuinnaat ingerlaneranni allanngorsimavoq, ilusilersuisuuneq isumaqarpoq.
- Great Greenlandimi ilusilersuisuuninngorama tamanit ima qisuariartoqartarpoq: Puisit amii atoqqusaappat? Tamatigullu nassuiaasariaqartarsimavugut Kalaallit Nunaannut qanoq iluaqutaatiginersoq, nungusaataanngitsumillu piniagaasut, puisillu uumasunut allanut sanilliullugit qanoq pitsaanerutigisumik atugassaqartitaallutik uumasimanersut. Ukioq manna tamanna misiginngilara, ilusilersuisuuneq oqarpoq.
Puisit amiinik eqqusseqqusinnginnermi Inuit ilanngunneqannginnissaat Nunatta Danmarkillu Bruxellesimi sorsussutigimmassuk puisit amiinik soqutiginnilersitsisimavoq.
Aamma atuaruk EU-p puisit amii pillugit paasititsiniaannginnera Inuit Silap isornartorsiorpaa
Ukiuunerani pisiassat kingulliit tunisaanerisa tamanna ersersippat, Jesper Høvring oqarpoq.
- Tunisingaatsiarpugut puisillu amiinut nangaasoqarnani. Tunisassiarput ajunngitsuusoq paasineqarsimavoq. Taamaammat isumaqarpunga akerliuneq malugiunnaaripput, ilusilersuisuuneq oqarpoq.
Europallu sinnerani aamma puisit amii soqutigineqaleraluttuinnarput.
- Soqutiginninneq annertusiartorpoq. Puisillu amii takussaaleriartorput.
Aamma atuaruk Puisit amiinik taskiliat kavaajaliallu Great Greenland annaatissavaat
Amerikamili puisit amiisa tunisaalersinnaanissaat piffissami qanittumi pinavianngilaq.
- Tusagassiortumik amerikamiumik pulaartoqarama paasivara puisit amiinik tunisassiorneq akerlerineqartoq. Allammi taakani inerteqqutaavoq, Great Greenlandimi ilusilersuisuuneq, Jesper Høvring oqarpoq.
Ataatsimut isigalugu Great Greenland ukiuni kingullerni aningaasarliorsimavoq ukioq kingullerlu Namminersorlutik Oqartussanit 15 millionit koruuninik aningaasaliiffigineqaqqilluni.
