Gerhardt ikerasaliortitserusuppoq
- Sineriassuatsinni angallateeqanik umiatsiaaqanillu angallanneq isumannaaneroqqullugu ATASSUT-miit isumaqarpugut, sumiiffiit ilaanni ikerasalioriaannaat aallartinneqarsinnaasut soorlu, Nanortallip kujataaniitoq Itilliatsiaq aamma Itilleq - taamaalilluni nunatta kujaterpiaani isumannaanerusumik angalasoqarsinnaaqullugu, pingaartumik ukiaanerani ukiukkullu minnerunngitsumillu sikorsuit nalaanni angallaneq eqqarsaatigalugu, Gerhardt Petersen tusagassiutinut nalunaarummini allappoq imalu nangilluni.
- Naluneqanngilaq pingaartumik ukiaanerani ukiukkullu aqqut Nanortalimmiit kujammut Narsarmiinut Aapilattumullu imaanaangitsuusoq, aammalu ajoraluaqisumik tamaani ajutoortoqartartoq nalunngilarput, Gerhardt Petersen allappoq.
Atassummiillu siunnersuutigineqarpoq, ikerasaliorniarnermi Kommune Kujalleq aamma Sisimiuni Sanaartornermi Ilinniarfimmi ilinniartuusut qaartiterinermik aatsitassarsiornermillu ilinniagaqartut ilinniutigalugu peqataalluarsinnaanerat.
