Georgiap illoqarfiisa pingaarnersaanni angut liivimit qimaasoorutigineqarsimasumit toqutaasimasoq, nunami namminermi pissutsinut ministeriaqarfiup oqaaseqartartua nutaarsiassaqartitsivimmut AFP-mut ilisimatitsivoq.
Sapaatit-akunnerata naanerani qarsutsinersuaqarneratigut uumasuusivissuarmi uumasut nujuartat arlallit qimaasoorutigineqarsimapput. Ilaatigut illoqarfiit pingaarnersaanni Tbilisimi uumasuusivissuaq eqqugaavoq.
- Liivi Tbilisip uumasuusivissuaneersoq illoqarfiup qiterpasissuani illoqannginnersap eqqaani angut upallugu toquppaa. Politiit immikkut sungiusakkat ornigutsinneqarsimapput liiverlu maanna ujaaralugu, oqaaseqartartoq AFP-mut taama oqarpoq.
Georgiami qarsutsisoqarnerani inuppassuit ajunaarsimapput. Taakkunannga pingasut uumasuusivissuarmi pineqartumi sulisuunerarneqarlutik.
Uumasullu Tbilisimi uumasuusivissuarmit sapaatiummat qimaasoorutigineqartut 30-t ilagaat tiigerit arfinillit, liivit arfinillit, nannut arfineq-pingasut amaqqullu arfinillit.
Nalunaaquttap-akunnerini arlalinni siallerujussuarnerata kingorna kuussuaq Vere Tbilisip qiterpassissuani qarsutsivoq. Aqquserngit inoqannginnersallu qarsunneqarput biilinik eqqugaasoqarluni illunillu nakkaattoqarluni.
