George H.W. Bush iluaallermat napparsimmavimmut unitsinneqartoq

Amerikamiut præsidentererisimasaat George H.W. Bush iluaallernermi kingorna naalagaaffimmi Texasimi illoqarfimmi Houstonimi napparsimmavissuarmut unitsinneqarpoq.

- Tassani uninngavoq. Isumannanngilaq, præsidentiusimasup allattoqarfiani pisortaq Jean Becker, nutaarsiassaqartitsivik Houston Chronicle naapertorlugu, taama oqarpoq.

Aamma oqaatigaa Buship peqqiilliulerneranut suna pissutaanersoq nakorsat arlalinnik nassuiaatissaqartikkaat. Maannalu nakorsartippoq.

Bush napparsimmavissuarmi Houston Methodist Hospitalimi uninngavoq, nakorsallu naliliinerat naapertorlugu ulluni qaninnerni angerlartinneqassaaq.

George H.W. Bush 92-inik ukioqarpoq. 1989-imit 1993-imut præsidentiuvoq. Piffissami tassani Irakip Kuwaitimik tiguaanerata kingunerisaanik USA kangia-qiterlermi kangerliumanermi sorsuunnermut akuliuppoq.

Bush republikanerineersoq præsidentitut qinigaanissami tungaanut præsidentip Ronald Reaganip ataani ukiuni arfineq-pingasuni præsidentimut tullersortaavoq. Bill Clintonimulli ajorsarnermi kingorna præsidentitut qinigaaqqinngilaq.

Ernera angajulleq, George W. Bush, præsidentitut kingusinnerusukkut qinigaavoq, 2001-miillu 2009-mut præsidentiulluni.