GE SIK-lu akissaatit pillugit isumaqatigiinnialersut
Illuatungeriit sammisaqarfinnik sisamanik ingerlatsisut isumaqatigiinniuteqarfigissavaat, tassalu sanaartornermik, allaffissornermik, tunisassiornermik kiisalu kiffartuussinermik assartuinermillu ingerlatsivinni sulisartut.
Isumaqatigiissutit maanna atuuttut ukiunut pingasunut isumaqatigiissutaapput marsillu 31-ani atorunnaassallutik.
Akissarsianik isumaqatigiinniartarnerit kingulliit eqqissisimasumik akaareqatigiissumillu pisarsimapput.
Suliumajunnaarnissamik ulorianartorsiorneq kingulleq 2008-mi marsimi pivoq, taamanikkut SIK-p aningaasaateqarfiinut akiliutissat assortuussutaanerat pissutigalugu. Illuatungeriilli suliumajunnaarnissaq ullormik ataatsimik sioqqullugu marsip 19-iani isumaqatigiissuteqarput.
Sulisitsisuni namminersortuni SIK-p ilaasortaminik suliumajunnaartitsinera kingulleq 2003-mi pivoq, taamanikkut akissarsianik isumaqatigiinniarnerit ajalusoormata.
Ulluni tallimani suliumajunnaaqqasoqarnerani aalisakkanik suliffissuit annikinnerusumillu sanaartorneq eqqorneqarput. Taamanikkut GA-mik isumaqatigiinniuteqarnermi aamma SIK-p aningaasaateqarfiinut akiliutit aaqqiagiinngissutit ilagisimagaat, Sermitsiaq.AG allappoq.
