GE: Aalisarnerup iluani Nunarput nammineq isummersinnaasariaqarpoq

Nunatta naalagaaffeqatigiinnerup iluani nammineq isumani annissinnaasariaqaraa, aalisarnermut naalakkersuisoq Karl Kristian Kruse isumaqarpoq. Sulisitsisunilu, GE-mi, siulittaasumit, Henrik Lethimit isumaqatigineqarpoq.
juulip 02-at 2015 13:00

- Isumaqatigisorujussuuara. Ilungersunavissumik qaqitaqartoq, uanga isumaqarpunga. Tassami Savalimmiut Kalaallit Nunaallu isumaqatigiittuaannanngitsut takoreerparput, taamaattoqaraangallu ajornartorsiutinik pilersitsisinnaalluni. Taamaammat aalisarnerup iluani namminersornerusumik sinniisoqarnissarput pissusissamisoorsoraara, GE-mi siulittaasoq Henrik Leth oqarpoq.

Avaleraasartuut, ammassassuit saarullernallu pillugit nunat assigiinngitsut akornanni isumaqatigiissutitini pingaarutilinni Nunarput ilaatinneqanngitsoq, Henrik Lethip aamma oqaatigaa.

Aamma atuaruk Krusep danskit aalisarnermut oqartussaajunnaarsikkusuppai

Nunallu assigiinngitsut akornanni isumaqatigiissutinut tunngatillugu Nunarput toqqaannartumik piumasaqarsinnaagaluarpat inissisimalluarnerussasoq, Henrik Leth isumaqarpoq.

Naalagaaffeqatigiinnerummi iluani isuma ataasiinnaq maannakkut atuutinneqartoq, Nunatta akueriinnartariaqarpaa.

Aamma atuaruk Tunngaviusumik inatsiseqalernissarput danskit naalakkersuisuisa killilimmik tapersersorpaat

- Savalimmiut avaleraasartuut pillugit Atlantikup Avannaata Kangiani Aalisarneq Pillugu Kommissionimi, NEAFC-imi isumaqatigiissusioqataammat, Kalaallit Nunaallu ilaatinneqarnani, tamanna kingullermik ajornartorsiutaavoq. Kalaallit Nunaat isumaqatigiissummut taamani akerliuvoq, Savalimmiullu akuersillutik. Nunallu taakku isumaqatigiinngikkaangata, pissutsit malillugit Naalagaaffeqatigiinnit taaseqataasoqarneq ajorpoq, Henrik Leth oqarpoq.

Taamanili ajornartorsiorujussuartoqanngitsoq, Henrik Lethip nassuerutigaa. Nunarpulli erseqqissumik taasisinnaasimagaluarpat inissisimalluarnerussagaluartoq, GE-mi siulittaasup ersersinniarpaa.

- Taamani kingunipiloqanngikkaluartoq, piffissami allami kingunipiloqarsinnaavoq. Uagut isummatsinnik annissisinnaanissarput pingaaruteqarluinnartoq ersersinniarpara, Henrik Leth oqarpoq.