GBU-p ESG-illu futsalertartut siuarsarniarpaat
Illup iluani arsartartut pikkorinnersaat 16-iniit 25-inut ukiullit ukiumut ataasiarlutik pingasoriarlutilluunniit katersuuttalissapput.
GBU-p piukkunnartunut suliniutaanut ESG aningaasanik tapiivoq. Nunap immikkoortukkuutaarluni katersuuttarnerit sumiiffimmut ataasiinnarmut katersuunnerniit akikinnerusut, tamannalu iluaqutissartaqartoq, GBU allappoq.
- Piukkunnartut nunap immikkoortuini siuarsarnissaannik GBU-p pilersaarutaa ESG-mik suleqateqarnerup iluaqutigissavaa, GBU-mi siulittaasoq, John Thorsen tusagassiutinut allappoq.
Arsaattartut kisimik pikkorinnerulissanngillat. Arsaattartut klubbiisa sungiusaasui siuttuilu aamma pikkorinnerulissapput, GBU-llu arsaattartunut ilinniartitseriaasia atorlugu ukioqatigiiaanut aaqqissuulluakkamik sungiusariaatsimik pilersitsisoqassasoq, kattuffiik allappoq.
Taava aamma arsaattartut nunanut allanut unammisartuuniaraanni peqqinnartumik inooriaaseqarnerup aalajaatsumillu sungiusartuarnerup pingaaruteqassusia ilinniartitsissutigineqassaaq. Arsaattartut ukioq kaajallallugu misiligarneqartassapput, taavalu sungiusarnikkut atortussallu eqqortut atorneranni piginnaanerminnik tamakkiisumik atuisinnaalernissaat anguniagaalluni.
Nunanut allanut unammisartunut sungiusaasut angalassaput
Nunanut allanut unammisartunut sungiusaasut Tekle Ghebrelul Rene Olsenilu suliniut nutaaq nunap immikkoortuinut saqqummiukkiartorlugu angalassapput.
- Arsaattartut sungiusaasuilu qasujaassuseq, saassusseriaatsinik paasinnissinnaaneq, ineriartornissamut piumassuseqalernissaq uani sulissutigineqassasut, GBU allappoq.
Kujataaniittut Qaqortumi ippassamiit sapaatiuppamut katersuuteqqaarput. Taava nunanut allanut unammisartunut sungiusaasut septembarip 23-ianit 25-ianut Ilulissaniissapput.