GBU DBU-lu kommuninit qaangerneqartut

Illoqarfinni ikinnerpaamik sisamani ivigaasanik arsaattarfiliornissamut aningaasassarsiussalluni DBU-p neriorsuutigisimavaa. DBU-lli aningaasassarsiornera suli aallartinngitsoq arsaattartut kattuffiat kommuninit tamanit qaangerneqareerpoq.

Ivigaasanik arsaattarfik mikinerusoq siullerpaaq FIFA-p tapersersuineratigut Qaqortumi 2009-mi pilersinneqarpoq. Nuummi 2015-imi aamma taama ittumik pilersitsisoqarpoq, kingornalu Nunatsinni sumiiffinni assigiinngitsuni arsaattarfiit tamakkiisumik angissusillit pilersiortorneqarlutik. 

Nunatsinni arsaattartut ivigaasanik arsaattarfimmi arsaassinnaanissartik ukiualuit matuma siorna takorluugariinnaraluarpaat, tamannali kommunit suliffeqarfiillu namminersortut iluaqutigalugit piviusunngorpoq, taakkumi illoqarfinni assigiinngitsuni arsaattarfittaarnissamik kissaatigineqartut naammassilertupallassinnaasimavaat.  

Nuummi arsaattartunut arfineq-marlunnut naammattumik ivigaasanik arsaattarfiliornissamut suliffeqarfissuaq Polar Seafood 2015-imi 500.000 koruuninik Nuuk Boldspil unionimut, NBU, aningaasaliissuteqarpoq, namminersortullu assigiinngitsut aamma aningaasaliissuteqarlutik. 

Nuup ilaani Nuussuarmi ivigaasanik kusanartorsuarmik arsaattarfiliortoqarnera sumiiffimmi meeqqanit utoqqarnut nuannaarutaallunilu atorluarneqalerpoq. Isikkamillu arsaallutik nunanut allanut unammisartut sungiusaasuata ukioq taanna aamma oqaatigaa Qasigiannguani arsaattaffimmi sioraasumi GM-ertoqareerpat Nunatsinni sioqqani arsaattoqarnerata naggaserneqartariaqartoq.  

Tamatuma kingorna Kommuneqarfik Sermersooq arsaattarfissanik pilerigineqaqisunik pilersitsiortorluni aallartippoq, kommunimilu ivigaasanik arsaattarfiit arfineq-marluk siorna pilersinneqarlutik. 

Qeqertarsuarmi aamma ivigaasanik arsaattarfiliortoqareerpoq. Polar Seafood aamma aningaasaliisoralugu. 

Nunatsinni isikkamik arsaalluni pissartanngorniunnerit Nuummi ivigaasanik arsaattarfimmi 2016-imi siullerpaamik ingerlanneqarput. GBU-p siulittaasuata John Thorsenip tamatuma kingorna oqaatigaa arsaattarfinni sioraasuni GM-ertoqaqqissanngitsoq. 

KNR-ip kommunit tamaasa ullumi attaveqarfigai, tamarmillu kommunit illoqarfiisa nunaqarfiisalu ilaanni ivigaasanik arsaattarfiliornissamik pilersaaruteqarlutik uppernarsarpaat.  

Anguniakkap ilaa anguneqartoq

Illoqarfinni assigiinngitsuni ivigaasanik arsaattarfissanik amerlanerusunik pilersitsiortornissamik GBU DBU-lu ukiualuit matuma siorna pilersaarusioqatigiipput. Nunatsinni arsaattartut atugaat akuerineqarsinnaanngitsutut isigineqarput, aamma arsaattarfissat pineqartut GBU-p UEFA-mut FIFA-mullu ilaasortanngornissamik qinnuteqaateqarnissaanut aqqutissiuisussatut atorniarneqarput.   

- Aningaasaateqarfiit attaveqarfigisatta aningaasaliissuteqarnerisigut kommunini sisamani ivigaasanik arsaattarfinnik 4-6-inik pilersitsinissaq qulakkeerniarneqarpoq, DBU-p siulittaasua, Jesper Møller, KNR-imut aasaq oqarpoq.

GBU DBU-lu kommuninit qaangerneqarsimarpasipput. Nunatsinni isikkamik arsaannerup iluani ineriartortitsinissamut DBU 25 millionit koruuninik neriorsuuteqarsimavoq. Aningaasalli taakku kommunit utaqqisinnaasimanngilaat. 

Avannaanili kujataanilu illoqarfiit aasaru ivigaasanik arsaattarfittaareerpata GBU DBU-lu aningaasanik atuisimanngikkaluarlutik anguniagartik angusimallugu oqaatigisinnaalissavaat. 

Paasissutissat

Kommunit makku ivigaasanik arsaattarfeqarput:

Kommune Kujalleq: Qaqortumi arsaattarfik mikinerusoq. Kommuni Narsami, Nanortalimmi Qaqortumi tamakkiisumik angissusilinnik arsaattarfiliornissamik pilersaaruteqarpoq. 

Qeqqata Kommunia: Maniitsumi arsaattarfik mikinerusoq ataaseq. Kommuni Maniitsumi Sisimiunilu aasaru tamakkiissumik angissusilinnik arsaattarfiliorniarpoq. 
Kommuneqarfik Sermersooq: Arsaattarfiit qulingiluat. Arsaattarfiit tamakkiisumik angissusillit marluk arsaattarfiillu mikinerusut arfinillik. Kommuni Tasiilami arsaattarfimmik angisuumik pilersitsinissamik pilersaaruteqarpoq. 
Qaasuitsup Kommunia: Qeqertarsuarmi arsaattarfik tamakkiisumik angissusilik ataaseq. Kommuni Ilulissani, Aasianni, Qasigiannguani, Uummannami Kangaatsiamilu arsaattarfinnik tamakkiisumik angissusilinnik sisamat mikinerusumillu ataatsimik pilersitsiortorniarpoq. 

Anguniagarli suli anguvissorneqanngilaq. DBU-mi illoqarfinni mikinerusuni nunaqarfinnilu multibaneeqqanik pilersitsiortornissamik neriorsuuteqarsimavoq, taakkulu meeqqat inuusuttullu arsaannermik nuannarisallit aallussinerulernissaannik qulakkeeriniarnissamut atorneqartussaapput.  

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!