GA: Sisimiuni akikinnerusumik pilersinneqarsinnaavoq

Nunatsinnit aalisakkat qaleruallillu avammut tunisassiarineqartut nakkutigineqarfissaat Royal Arctic Linemit napparneqartussaq, Danmarkimilu inuussutissanik nakkutiliisoqarfimmit ingerlanneqartussaq, 4 aamma 6 millionit koruuninik akeqassangatinneqarpoq.

Taamaattorli Sisimiuni Sulisitsisut Peqatigiiffianni siulittaasup, Lars Løvendahlip aamma Qeqqani inuussutissarsiornermut siunnersuisoqatigiit pisortaata, Pollas Lyberthip Sisimiuni pitsaanerusumik akikinnerusumillu pilersinneqarsinnaasoq isumaqarput.

Nakkutilliiviup pilersinneqarnissaata akiata qulerarterutaannaanik akiliilluni Sisimiuni pilersinneqarsinnaasoq Lars Løvendahl aamma Polas Lyberth isumaqarput. Aamma nakkutilliiviup Nuummi umiarsualivimmut ulikkaaqqareersumut inissinniarneqarniarnerat tupigaat.

- Nakkutilliiviup illuutinut pigineqareersunut inissinneqarneratigut, millionit koruunit affaat inorlugit aningaasartuuteqarluni Sisimiuni inissinneqarsinnaavoq. Kisianni suut tamaasa Nuummut inissinneqarnissaat kissaatigineqanerugunarami, qanorluunniit akeqassagaluarpat, Lars Løvendahl aamma Pollas Lyberth allapput.

Nerisassat immameersut tamarmik, Nunatsinnut tulaanneqartut, EU-mut nassiunneqartinnagit maani misissorneqartassapput.

Suliffeqarfiit nerisassanik imaneersunik tunisassiortut naatsorsuutigaat EU-mut nassiusisarnerni maannamut atuutsinneqartumit akitsuutinik akiliisarnerminnut million koruunilikkaanik sipaartalernissartik. Taamatuttaaq aalisariutit nunanit allaneersut 70-it missaanniittut aamma sipaartalissapput.

Ukiup ataatsip ingerlanerani nakkutilliiffissap piareerluni atorneqalersinnaanera naatsorsuutigineqarpoq.