GA: Qineqqusaarneq politikkikkut inerisimannginnermik takutitsivoq
Tamannalu ajuusaarnarpoq nunattalu oqaluttuarisaanerani aatsaat taama aningaasaqarniarnikkut ilungersunartorsiortoqartiginerani politikkikkut inerisimannginnermik takutitsilluni.
GA isumaqarpoq Inatsisartunngorumaartussat partiinik politikerinillu tatiginartunik ilumoortumik inuiaqatigiinnut oqaluttuarnissaminnut sapiissuseqartunik aammalu politikkikkut aaqqiissutissat pisariaqartut oqimaatsullu kinguariartornerup siumut-saatsinnissaanut aqqutissaasut suleqatigiissuteqarusuttut katiterneqarnissaannut qinersisartut akisussaaffimmik angisuumik tigummiagaqartut. Taamaaliortoqanngippammi nunatta aningaasaqarniarnikkut ajalusoornissaata qanillattoqqinnissaa aarlerinarsissammat.
- Inuussutissarsiornikkut aningaasaliinerit nutaat pisariaqarluinnartullu anguneqassappata patajaassuseq, suleqatigiinneq tatiginarnerlu pisariaqarluinnarput, taakkumi inuiaqatigiinni suliffissanik kaaviiartitsinermillu pilersitsisinnaammata, GA-p pisortaa Brian Buus Pedersen taama oqarpoq.
Taanna aamma isumaqarpoq politikkikkut sangujoraartumik ingerlasoqarnera qanorlu siunertaqarnermik paatsiveerussaaneq, takornariaqarneq, aalisarneq, aatsitassarsiorneq, sanaartorneq inuussutissarsiutillu allat pineqaraluarpata aningaasalersuisartunik nangaalersitsisinnaasoq. Kalaallit Nunaat aningaasalersuinissamut atugassarititaasunik patajaatsunik piffissarlu ungasinnerusoq allanngujuitsunik atugassaqartitsinissamik erseqqissumik takutitsippat aningaasalersuisartut aatsaat toqqissisimalissapput Kalaallit Nunaannilu aningaasalersuinissaminnut nangaajunnaarlutik, Sulisitsisut qineqqusaarnermut oqaaseqaataanni toqqaannartumik taama allassimavoq.