GA: Kalaallit Torontomi peqataatitaat iluatsitsilluarput
Kalaallit Nunaannit Sulisitsisut Peqatigiiffiat tallimassaa suliffeqarfinnit nunatsinneersunit aallartitanut aatsitassarsiorfiit ataatsimeersuarnerannut tuniniagassanillu saqqummersitsinermut angalatitsivoq.
Angalatitallu pissanganartumik soqutiginartumillu naapeqateqareerput, ilaatigut Canadami aatsitassarsiorfiit peqatigiiffiat Mining Association of Canada, Nunavut Chamber of Mines, ingeniøritullu suliffeqarfiit siunnersuisartut, eqqartuussissuserisartut aatsitassarsiornermi inatsisinut immikkut ilisimasallit, minnerunngitsumillu Rod Thomas ataatsimeersuarnermi PDAC-imi aqutsisuusoq ataatsimeeqatigisimallugit.
Kalaallit Nunaanni nungusaataanngitsumik aatsitassarsiorneq
Nunatsinnit allartitat paasiniaaqatigiinnermut "Sustainable Mining in Greenland"-imik - tassa Kalaallit Nunaanni nungusaataanngitsumik aatsitassarsiornermik - taaneqarsimasumut qaaqqusisimapput.
Paasiniaaqatigiinnermi ilaatigut aatsitassarsiorfiit, Kalaallit Nunaanni aatsitassarsiornermik ingerlataqartut, arfineq marluk pisortai oqallitsinneqarput Kalaallit Nunaanni aatsitassarsiornermut suliffeqarfiit isiginninnerat, suliffeqarfiit maanna ingerlataat, siunissamilu ingerlatassaat, aatsitassarsiorfiillu akimmiffigisartagaat oqallisigineqarlutik.
Paasisimasallit sassartitat ilaatigut: nunat tamalaat akornanni immikkut paasisimassallit, aningaasaliisartut aningaasaatillillu, inatsisilerituut, ingeniøritut suliffeqarfiit siunnersuisartut suliffeqarfiillu logistikkimik suliallit Kalaallit Nunaanni aatsitassarsiornermi akimmiffiit periarfissallu itisilerlugit eqqartorpaat.
Aningaasaqarnermut aatsitassanullu naalakkersuisoq Anda Uldum naalakkersuisoqarfimmilu pisortaq Jørgen T. Hammeken-Holm paasiniaaqatigiinnermi peqataapput. Kalaallit Nunaannit peqataasut eqqaassanngikkaanni takkutut soqutiginnittut amerlapput ilaatigut Canadamit, Australiamit, USA-mit Europamillu peqataasoqarluni.
Ataatsimeersuarneq PDAC ullumi (pingasunngorneq) naammassissaaq, nunatsinniillu aallartitat tallimanngorpat angerlassapput.
