Futsalimik unamminissat pissannganartut

Nuummiit GSS holdinik marlunnik peqataatitaqassaaq, ukiorlu kingulleq pissartanngortut B-67 holdinik sisamanik peqataatitaqassalluni. 

Polar Seafood Cupimi Nagdlunguak-48 aamma peqataassaaq, holdinillu marlunnik peqataatitaqassalluni. Ukioq kingulleq unammiuaarnerni N-48 ukiukinnerusunik peqataatitaqarpoq. N-48-p arsariaasaa ilisarnartuuvoq. Saassussillaqqinneq, arsalerillaqqinneq, holdimi ataqatigiilluarneq, isertitsinissamullu periarfissarsiullaqqinneq.

Nagdlunguarmiulli arsalerillaqqissorsuugaluarlutik timimikkut mikinerunertik peqqutigalugu ukioq kingulleq unamminermi 5-inngorput. Taamaakkaluartoq arsalerillaqqinnerat arsaqatigiilluarnerallu oqallisaaqaaq.

N-48-mit ukioq kingulleq peqataasut amerlanerit ukioq manna unammeqataaqqissapput. Ukiumik ataatsimik ukioqqortusinerunikuupput, taamaammat qanoq siuariarsimanerat takunissaa qilanaarineqarsinnaavoq.

- Arsariaaserput allanngortinngilarput, ineriartortinnikuuarpulli, N-48-mi sungiusaasoq Niels Thomsen KNR-imut oqarpoq.

Inuusuttut arsamik nuannarisallik

Unammisussat katillugit holdit arfineq pingasuupput, tamarmik imminnut unammissapput, taamaammall unamminerit amerlassallutik. Naatsorsuutigineqarsinnaavoq illoqarfimmiut holdiini unamminerit naligiittaqattaarsinnaasut.

N-48 tupaallatsitsisinnaavoq ukioq mannalu pissartanngorlutik. Klubbili ukioq manna aaqqissuisuusoq, B-67, cup-imi pissartaanani illersussagaa naatsorsuutigineqarsinnaavoq. B-67-imi unammisartut timimikkut nukittupput arsalerillaqqissuullutillu, ajugaanissarnerlu sungiusimallugu.

Ataatsimut tamaat isigalugu inuusuttut arsamik nuannarisaqartut isertitseqattaarrannissaat naatsorsuutigineqarsinnaavoq.

Cuppi Inussivimmi pissaaq. Unamminerit pisussat uani alakkarneqarsinnaapput.