Futsalimi Nunatsinni pissartanngortut siulliit tassaapput B-67
Futsalimi Nunatsinni pissartanngortut siulliit tassaapput B-67 Nuummeersoq, SAK, Sisimiuneersoq, finalimi ajugaaffigineqarami.
Unammisut naligiissimaqisut, Sermitsiaq.AG-p nittartagaani allaaserineqarpoq.
B-67-ermiulli unamminerup immikkoortuata aappaani allanngorsimasullusooq ittut aamma allaaserineqarpoq, tassami unammineq naammassineqarmat B-67 4-0-imik ajugaagami.
Kâgssagssuk, Maniitsumeersoq, N-48-lu, Ilulissaneersoq, bronzinnanniupput, akunnerlu ataaseq unammisoqareermat holdit 2-2-mik naligiipput, immikkullu ittumik minutsini tallimani unammeqqittariaqarsimallutik. N-48 immikkut ittumik unammeqqinnermi siuajaarput, Kâgssagssummiullu akeqqissinnaasimanatik. N-48 3-2-mik taava ajugaavoq, bronzinnallutillu.
Assammik arsarluni U-18-imik Nunatsinni aamma pissartanngorniuttoqaqqammerpoq, angutit arnallu Sisimiuni pissartanngorniullutik.
SAK, Sisimiuneersoq, pissartanngorniunnermi ajugaallualaavippoq, tassami SAK angutini arnanilu ukioq manna pissartanngorami. Angutit finalerneranni SAK GSS-imut, Nuummeersumut, 32-27-mik ajugaavoq, arnallu finalerneranni SAK GSS-imut aamma unammivoq, SAK 33-23-mik ajugaalluni.
Angutini bronzinnanniuttut tassaapput Nagtoralik, Paamiuneersoq, Kâgssagssummut, Maniitsumeersumut, unammigami. Nagtoralik 32-26-mik matumani ajugaavoq. Arnani bronzinnanniuttut tassaapput Kâgssagssuk Holdfællesskabetimut unammisut. Kâgssagssuk matumani 21-17-imik ajugaavoq. Sermitsiaq.AG taama allaaserisaqarpoq.
