Futsal: Kalaallit Kroatiamut qaaqquneqartut
Kalaallit futsalertartui arsalerillaqqissutsikkut nukittussutsikkullu nunanut allanut unammillersinnaalluartut kalaallit sungiusaasuisa oqaatiginikuuaat. Tamannalu Norgemi tusagassiorfiit ilaata, kalaallit Norgemut 4-3-mik ajugaareersut, aamma oqaatiginikuullugu.
Kalaallit maanna unammillersinnaanerminnik takutitseqqinnissaminnik periarfissinneqarput.
Nunarsuarmi pissartanngorniuuttussat piareersaatitut unammiuaarnissaannut, aappaagu januaarimi pisussamut, immikkut ittumik Finlandip nunanut allanut unammisartuini sungiusaasup kroatiamiup unammeqataasinnaanissaannut qaaqqusimavai.
Tamanna pivoq kalaallit Nordic Cupimi peqataanerminni Finlandimut, nunarsuarmi pitsaanerpaanut 40-nut ilaasunut, unamminermi 6-4-mik ajorsaraluarlutik takutitsilluarsimammata.
- Finlandimut unammigatta arsarluaqaagut, tamannalu Finlandip sungiusaasuata nuannareqaa. Allaat januaarimi unammiuaarnissamut pisortatigoortumik siullermeerluta qaaqqusaalluta, kalaallit nunanut allanut unammisartut sungiusaasuat, Rene Olsen, KNR-imut oqarpoq.
AAMMA ATUARUK Kalaallit arsaannermi unammillersinnaasut
GBU: Unammigiarnissaq piviusorsiortuuvoq
Kalaallit nunanut allanut unammisartut siullermeertumik pisortatigoortumik Kroatiamut qaaqqusaasimanerat Kalaallit Nunaanni Arsaattartut Kattuffianni, GBU-mi, siulittaasup John Thorsenip piviusorsiortutut isigaa.
- Peqataasinnaanerput piviusorsiortuuvoq, Nordic Cupimimi unammisartugut takutitsilluarsimanngikkaluarunik soqutigineqaratillu qaaqqusaasimassanngikkaluarput, John Thorsen KNR-imut oqarpoq.
Aningaasat apeqqutaasut
Unammigiarluni angalaneq akisuvoq kalaallillu Kroatiamut unammigiassappata aningaasaliisussanik nassaarnissaq avaqqunneqarsinnaanngilaq.
- Inuit arsarsinnaasut pigaagut, sungiusaasut sungiusaasinnaasut pigaagut taamaallaat unammiuaarnerup aningaasassaqartinneqarnissaa apeqqutaaginnalerpoq, John Thorsen oqarpoq.
Taamaammat aningaasanik ujaasinissaq piffissaq qaninnerpaaq atorlugu pissasoq Kalaallit Nunaanni Arsaattartut Kattuffianni siulittaasup oqaatigaa.
Kalaallit futsalertartut VM-imut piareersaatitut unammiuaarnermi, Kroatiami pisussami, unammeqataassagunik danskit, norskit, Montenegromiut kiisalu San Marinomiut unammissavaat. Taakku nunarsuarmi pitsaanerpaat allattorsimaffianni 69-itut, 66-tut, 63-itut kiisalu 114-attut inissisimapput.
GBU-lli FIFA-mut ilaasortaannginnera peqqutaalluni kalaallit allattorsimaffimmi ilaanngillat.
