Frelsens Hærimi juulli

Taakku ilaat angerlarsimaffeqannginnertik pillugu, ilaquttaminnik ikinngutiminnillu juullisioqateqarneq ajorput. Taakkulu ilagaat Kaali Lyberth, taanna ukiut aappassaanik angerlarsimaffeqanngilaq.

Taamaattumik Kaali Lyberthip nuannaarutigaa, Frelsens Hærip illuutaa kialaartoq Nuummi ammarsimammat, taamaalilluni angerlarsimaffeqanngitsut allat ilagalugit juullikkunni isersimaarsinnaalluni.

- Frelsens Hæri maani Nuummi illumik pilersitsisimammat qujanartorujussuuvoq aamma maannga illoqarfimmut tikilluaqqusaalluarnera qujanartorujussuulluni. Taamaattoqarsimanngitsuuppat Nuummi angerlarsimaffeqanngitsut immaqa sakkortunerujussuarmik inuuneqassagaluarput, ingammik juullikkunni, Kaali Lyberth taama oqarpoq.

Frelsens Hæri Nuummi
Frelsens Hæri ukiut 150-it matuma siorna pilersinneqartoq nunani assigiinngitsuni 127-ni ilaatigut angerlarsimaffeqanngitsunut ikiuuttarpoq. Nuummilu ukiut marluk matuma siorna illuuteqalerput, kikkulluunniit angerlarsimaffeqanngitsuugunik kiserliortuugunilluunniit kialaarfigisinnaasaannik.

Frelsens Hærip illuutaa, Nuummi H.J. Rinksvejimiittup ornigarneqarluartarnera, Frelsens Hærimi majorip, tassa ingerlatsisup, Kurt Pedersenip nuannaarutigaa.

- Illuutitsinnut orniguttartut malunnartumik tamanna iluaraat qujamasuutigisaraallu malunnarluni. Taamaattumik kalaallisut oqaaseq siulleq ilikkagarput tassaavoq 'qujanaq', tamatumalu kingunerani oqaaseq alla ilikkagarput tassaavoq 'illillu'. Uagut nuannaarutigeqaarput maani Nummi illuuteqalersimagatta, Kurt Pedersen oqarpoq.

Taassuma oqaluttuaraa, Frelsens Hærip suliassaasa pingaarnersarigaat, kiserliortut angerlarsimaffeqanngitsullu ikiornissaat, taamaattumillu upperisartik sakkuliullugu ikiuiniarnertik ingerlanneq ajorlugu, Kurt Pedersen nassuiaavoq.

- Aqqusinertigut ingerlaartillunga inuk kiserliorpasissoq kaattorlu ornillugu oqarfigisinnaagaluarpara, 'Jesusip asavaatit'. Tamannali kisiat sakkuginiarukku, assigiinnarpaa inuk taanna ersaatigut isakkukku, tassami inuup kaattup Guutip asanninnera malugisinnaanngilaa, Kurt Pedersen oqarpoq.

Juullip aappaani nerersuartitsinissamut qaaqqusipput
Taanna aamma oqarpoq juullip aappaani, tassa decembarip 26-anni kikkunnulluunniit piumasunut nerersuartitsinissamut qaaqqusillugit.

- Puulukiminermik siataqassaaq, nersussuup tartunaanik siataqassalluni, saarulliit tisaat siatat, qallersuutissat assigiinngitsut aamma soorunami ammassassuit imilitsikkat allallu juullikkunni sassaalliutigineqartartut nerineqarsinnaassallutik. Imigassanilli aalakoornartunik sassaalliissanngilagut.

Frelsens Hærimi majorip, Kurt Pedersenip nuliatalu, Helle Pedersenip illu Nuummi H.J. Rinksvejimiittoq ulluinnarni ingerlataraat.

Decembarip 26-anni nalunaaqutaq ullup qeqqaniit ualikkut nalunaaqutaq sisamap tungaanut neriartortoqarsinnaavoq. Aamma decembarip 30-anni aamma 31-anni illu kikkunnuulluunniit ammassalluni. Ukiutoqqami aamma nerersuaqatigiittoqassaaq nalunaaqutaq ullup qeqqaniit ualikkut sisamap tungaanut.

Isersimaartarfiit allat juullikkunni aamma orninneqarsinnaasut ammanissaat pissutaalluni, Frelsens Hærip illuutaa decembarip 26-anni taamaallaat ammassaaq.