Frederik, Piitannguaq Linnet, Arctic Circle Racemi peqataassapput
ACR-ip komite-a najoqqutaralugu kunngissaq Frederik, quiasaarisartorlu nuannarineqarluartoq Piitannguaq Alaufesen aammalu danskit erinarsortartuat ilisimaneqarluartoq Anne Linnet erneralu Xander Linnet peqataassapput.
Ujakkaarluni arpannissaq ukioq manna ukiuni 20-inngortorsiorluni nalliuttorsiornermi aatsaat taamak amerlatigisunik peqataaffigineqassaaq.
Inuit 223-it nunanit assigiinngitsunik 14-ineersut peqataanissamut nalunaarsimapput. Ukioq 1997-imi inuit peqataanissamut nalunaarsimasut amerlanerpaaffigisimasaat tassalu inuit 182-it nalunaarsimaneri, maanna rekord-ililluni qaangerneqarpoq.
Sisoraatinik arpannerup saniatigut Arctic Circle Race ukiuni 20-inngortorsiorluni nalliuttorsiorneranut atatillugu Anne Linnet akustisk-imik tusarnaartitsissalluni neriorsuivoq, ACR-ip komite-a tusagassiutinut nalunaaruteqarnermi ilisimatitsivoq.
Sisoraatinik arpanneq Sisimiuni ingerlanneqartartoq ukiut ingerlanerini ilisarisimaneqarluartunik kajungerineqartarpoq. Ilaatigut ilisarisimaneqarluartut misilittagaqarluartullu ilaatigut taaneqarsinnaasut ilagaat Bjørn Dæhli, VM-imi OL-imilu pissartaasartoq Norgemeersoq aammalu ujakkaarutinik arpattartoq.
