Franskit sermersuaq aattoq takussavaat

Tamannalu sermimik tonserpassuarnik oqimaassuseqartumik Nunatsinnit Parisiliaassilluni tupaallatitsinikkut, oqallitsitsinikkut misigisaqartitsinikkullu pissaaq, Parisimilu inoqannginnersami sermeq inuit saanni aakkiartuaartinneqassalluni.

Tamanna Sermitsiami ullumi saqqummersumi allaaserineqarpoq.

Eqqumiitsuliortoq Olafur Eliasson ujarassiornermilu professori Minik Rosing, aammaarlutik sermimik sermersuarmeersumik saqqummersitsinermik aaqqissuisuupput, soorluttaaq 2014-imi FN-ip silap pillugu ataatsimeersuartitsineranut atillugu Københavnimi Rådhuspladsimi sermit aqqaneq marluk taamatut saqqummersinneqartut.

Olafur Eliassonip oqanera naapertorlugu Parisimi sermeq saqqummersitassaq, Københavnimi saqqummersitamit annertunerussaaq.

Aamma atuaruk Iluliamerngit Københavnimi

2014-imisulli Nuummeersoq Group Greenland, Kuupik Kleistimit Hans Pavia Egedemillu pigineqartoq, assartuinermut tunngasumik isumaginnittuussaaq.

- Sermimik uangut assartuineq isumagiinnartussaavarput. Isumassarsiaq pilersaarusiornerlu Olafur Eliassonimit aaqqissuunneqassaaq. Kangerlummut sermimik aalleriarluta, taanna containerimut ikisinnarlugu nassiutissavarput, Københavnimullu apuunneqareerpa tassani puuiassallutigu, Kuupik Kleist Sermitsiamut oqaluttuarpoq.

Taannalu maanna kassunik annertuunik passussinermik misilittagaqarlualereerpoq.

- Sermip ilivitsukaanngorluni piffimmukaannissaa unammillerneqartuuvoq. Taamaammallu aserornagit taakku qaqinnissaat, kingornalu containerimut qerititsivimmut 40 fodimut ikinissaat unammillernartuulluni, Kuupik Kleist Sermitsiamut oqaluttuarpoq.