ASSIT Assiliisartoq ’Amerikamiut naasuinut’ akerliunermut atsiortitseqattaarpoq
Assiliisartoq amerikamiu Ken Bower Tasiilap ungasinngisaanut Ikatermut amerikamiut timmisartoqarfigisimasaannut Bluie East 2-mut marloriarluni tikissimavoq. Takusimasanilu avaanngunartissimavai.
- 2014-imi siullermik tappavaniikkama annilaarnartorujussuuvoq. Kangerluk qaqqallu kusanartorujussuullutillu tiguartinnartorujussuupput, qattunikkullu qummukaraanni sakkutooqarfiusimasumukartoqartarpoq. Aallaqqaammut naaffeqanngitsutut eqqarsarnarpoq. Nappartat manngertorninikut dieselimik uuliartaqartut, biilit, atortorissaarutit, sannatit, illorsuit isanikut takullugit annilaarnartorujussuupput, New Yorkimit oqarasuaatikkut oqaloqatiginerani oqarpoq.
Assiliisartoq amerikamiu nunap isikkuanik assiliisartuunermini issittumi sumiiffinnut assigiinngitsunut angalasarpoq. Kalaallit Nunaannukarusullunilu 2013-imi takorloortalerpaa, angalanissaminulli siunertassaminik ujartuivoq.
- Piaarinaatsoornikkut sakkutooqarfiusimasumit assit internettikkut takuakka. Misissuilaareerlunga aalajangerpunga, tassa tappavunga assiliiartorlunga aallarniarlunga, sakkutooqarfiusimasormi tusagassiutitigut allaaserineqarsimanngilaq, assiliisartoq oqarpoq.
Bluie East 2-imut tunumut 2014-imi siullermik aallarpoq.
- Sakkutooqarfiusimasumi unnuivunga. Uterfigeqqittariaqarlugulu erngerlunga paasivara, sakkutooqarfiusimasormi angajaarsuuvoq. Kisianni ukiup ingerlanerani piffissami allami aamma uteqqikkusuppunga, 2015-imilu juulip qaammataani nunap aputeqarnerani uteqqippunga. Sakkutooqarfiusimasullu pillarlukui aputip ersarinnerulersippai, Ken Bower oqarpoq.
Sorsunnersuup aappaani 1942-imi piffinnit tamanit Nazi-Tyskit sorsunneqarnerata nalaani amerikamiut sakkutooqarfik pilersippaat, 1947-milu qimallugu. Amerikamiullu sakkutuuisa Bluie East 2 sorsunnersuup kingorna atorfissaaruppaat, atortutillu tamaasa qimaannarlugit aallarput. Biilersuit, atortut, illut, pequtit uuliamullu nappartat hunnorujukkaat ullumikkumut suli uninngaannarput. Eqqaanilu najugallik ‘amerikamiut naasui'-nik tamakku taagorpaat.
Ken Bowerip sakkutooqarfikoq nammineerluni takoreerpaa, Det Hvide Husillu pillarlukut suli Kalaallit Nunaata kangianiittut qanoq iliuuseqarfiginerai akissutersiniarlugu atsiornernik katersilluni aallartippoq.
Ullunilu 30-ini atsiornerit 100.000-it katersorsimassagai piumasaqaataavoq. Tallimanngormat ullaakkut atsiornernik katersineq sapaatit akunnerini marlunni ingerlareersoq, atsiornerit 28.000-it Ken Bowerip pissarsiarisimavai.
- Neriulluaqaanga, Ken Bower oqarpoq.
Assiliisartullu suliaqarnini koruuninnguamik akissarsissutiginagu nammineerluni aningaasalersorpaa.
- Assinik suli tunisaqanngilanga. Atsiortitsinerullu 100.000-it anguppagit, naleqartorujussuussaaq, naggasiilluni oqarpoq.
