Politikerit qinersivinnik pilersitseqqikkusukkunik eqqarsarluaqqaartariaqartut

Apeqquteqaat aallaavigalugu oqallinnissamut siunnersuummini Siumut allappoq, nunap immikkoortuisa ilaat ullumikkut Inatsiartuni sinniisukittut, partiilu isumaqarami tamanna ajornartorsiutaasoq qinersiveqalernikkut tamanna aaqqinneqarsinnaasoq.

Politikerilli qinersiviit eqquteqqinniarunikkit mianersortariaqartut immikkut ilisimasalik oqarpoq. Qinersiviimmi partiit aalajangersimasut salliutissinnaammatigit taamaalillutillu nunami pissaanermik aalajangiisuulerlutik.

- Maannakkut aaqqissuussisimaneq qimallugu qinersivinnik pilersitsiortorniaraanni, taava eqqarsarluarnissamut aatsaat peqqutissaqalissaaq, inuiaqatigiit pillugit immikkut ilisimatusarsimasoq Ilisimatusarfimmit soraarneq Birger Poppel oqarpoq.

Taanna isumaqarpoq Nunatsinni qinersivinnik pilersitseqqinnissaq kissaatigigaanni politikerit eqqarsarluaqqaartariaqartut.

Qinersivinnimi partiit aalajangersimasut salliutinneqariataarsinnaapput taamaalillutillu qinersinerup inerneranik aalajangiisuulerlutik.

- Apeqqutaalluni qinersiviit qanoq agguataarneqarnersut inernerilersinnaavaa partiit aalajangersimasut ajunnginnerusumik pineqarnerat, Poppel oqarpoq.

Immikkut ilisimatusarsimasup USA aarlerisaarutigisinnaasutut taavaa, politikkikkut akiuunnermi nunap immikkoortuinik pissarsiniartarnerit, taamaalillutik partiit angisuut marluk - Republikanerit imaluunniit Demokraatit arlaat toqqarsinnaallugit.

Qinersiviit pilerseqqinniarlugit politikerit isumaqatigiissagunik eqqarsarluaqqaassasut Birger Poppel isumaqarpoq.

- Taamaattumik kaammattuutigerusuppara immikkut ilisimasalinnik - aamma qinersinermi matematikimik ilisimasalinnik allannguinerup kingunerisinnaasai pillugit nalilersueqqullugit, Poppel oqarpoq.

TV-kut aallakaatittakkatsinni Isummersorfimmi qinersiviit pissaanermut sunniutai pillugit annertunerusumik tusagaqarsinnaavusi.

Taanna arfineq pingasunut kalaallisut aallakaatinneqassaaq qallunaatullu qulingiluap qeqqa.