Tasiilami oqarasuaatit attavii aaqqinneqalersut
Tasiilamilumi oqarasuaatit Tele-Postip attaveqaatai piffissami kingullermi tattoqisaaffiusimaqisut TELE-POST-ip namminneerluni takusinnaavaa, ilaatigullu oqarasuaatit angallattakkat aqqutaat kipisarsimalluni internettimullu attaveqaatit arriinnerulertartut malunnarsimalluni. Taama TELE-POST tusagassiutinut nalunaarusiaanni allagaqarput.
Taamaariarmiat tunumi illoqarfimmi oqarasuaatit aqqutaat pitsanngorsarneqassasut Tele-Postip teknikkikkut it-lerinermullu pisortaasup Jonas Hasselriisip neriorsuutigaa:
- Tasiilami oqarasuaatit aqqutaat tattoqisaaffiuleraluttuinnartut malugisinnaalluaratsigu Tasiilami atortorissaarutitta qanorililluta aasamut pitsanngorsarsinnaassanerivut misissuleruttorparput. Taamaasiorlutami atuisartutta atugarissaarnerulernissaat anguniarsariniaratsigu, Jonas Hasselriis oqarpoq.
Tasiilamili oqarasuaatit angallattakkat aqqutaat satellittimullu attaveqaat aasartinnagu Tele-Postip inississorluarallarniarpai, taamaasilluni Tasiilarmiut attaveqaatitigut ajornartorsiunnginnerulaarniassammata.