Fontainip akileraarut qaffanneqarsinnaanersoq misissorniaraa

Napparsimasunut Københavnimut suliaritikkiartortunut ingiaqataasut ullaakkorsiornermut najugaqarnermullu akiligassarpassuaqalernissaat pinngitsoortinniarlugu akileraarutip procentimik ataatsimik qaffanneratigut aaqqiissuteqarfigineqarsinnaanersoq peqqissutsimut naalakkersuisup Agathe Fontainip misissorniarpaa.
Assi © : KNR
januaarip 05-at 2017 09:48

Napparsimallutik Danmarkimut suliaritikkiartortut qanigisaat 2017-imi januaarip aallaqqaataa aallarnerfigalugu Kalaallit Peqqissartut Illuanni akeqanngitsumik najugaqarsinnaanngorput. Napparsimasorli napparsimmavimmut unippat ingiaqataasup ullaakkorsiuteqarnini najugaqarninilu nammineerluni akilissavai.

Taamattoqarneralu Agathe Fontain naapertorlugu akileraarutip procentimik ataatsimik marlunnilluunniit qaffanneratigut aaqqiissuteqarfigineqarsinnaagunarpoq. 

Savalimmiuni taamaaliorsimapput. Fontain naapertorlugu napparsimasut nunartik qimallugu suliaritikkiartortut aningaasartuutaat matussuserniarlugit akileraarut procentimik ataatsimik qaffassimavaat. 

Nunatsinnili Savalimmiunilu akileraarutitigut isertitat angalanermullu aningaasartuutit assigiinngillat. Taamaammat peqqissutsimut naalakkersuisup Nunatsinni qanoq iliortoqarsinnaanersoq misissorniarpaa.

- Savalimmiunut toqqaannartumik assersuussinnaanngilagut. Savalimmiuni procenti ataaseq qanoq pissarsiaqaataasarnersoq, uagullu procenti ataaseq qanoq pissarsiaqaatigisinnaaneripput misissortikkusuppara, Agathe Fontain KNR-imut taama oqarpoq. 

- Imaassinnaavoq akileraarut procentinik marlunnik qaffattariaqaripput, naalakkersuisoq oqarpoq. 

Akileraarutip qaffanneqarnissaanut atatillugu aamma Danmarkimi kalaallit peqqissartut illuata siunissami allilerneqartariaqarsinnaanera eqqarsaataavoq. Fontain naapertorlugu peqqissartut illuat piffissap ilaani ulikkaaqqasarpoq napparsimasullu Københavnimi akunnittarfinnut inissinneqartariaqartarlutik.

- Napparsimasuinnaat tassani najugaqartuunngillat. Aamma misissortikkiartortut tassani najugaqartarput, peqqissutsimut naalakkersuisoq oqarpoq.  

Akileraarutip qaffanneqarsinnaaneranik nalunaaruteqarneq pivoq, naak naalakkersuisooqatigiinnissamik isumaqatigiissummi allassimagaluartoq Siumup, Partii Naleqqap Inuit Ataqatigiillu akileraarut qinigaaffimmi uani qaffannianngikkaat. 

 

Paasissutissat:

Napparsimasut qanigisaat Kalaallit Peqqissartut Illuanni najugaqarsinnaapput. Napparsimasup Peqqissartut Illuanniinneraniinnaq qanigisaasoq akeqanngitsumik najugaqarsinnaavoq. Napparsimasoq napparsimmavimmut unikkaangat Peqqissartut Illuanniikkunnaartutut isigineqartarpoq. Taamaammat qanigisaasut tamatuma kingorna Kalaallit Peqqissartut Illuanniinnertik akigitinneqartut naapertorlugit namminneq akilissavaat.

Kalaallit Peqqissartut Illuat soorunami napparsimasunut siullertut atugassiaavoq. Peqqissartut Illuat napparsimasup qanigisaanut inissaqartitsinngippat, taava qanigisaasup najugaqarnini nammineerluni isumagissavaa, tassunga ilaallutik najugaqarneq Danmarkimiinnermilu aningaasartuutigineqartut allat.

Najoqqutarisaq: Kalaallit Peqqissartut Illuat