Folketingip Illersornissamut ataatsimiititaliaa nunatsinnut paasisassarsioriartulersoq
Folketingip Illersornissamut ataatsimiititaliaani ilaasortat paasisassarsioriartorlutik marlunngornermi nunatsinnut tikissapput. Ataatsimiititaliami ilaasortat pilersaarutigaat marlunngornermi ullaakkut Savalimmiuniit Tunumut Mestersvigimukariarlutik Nuummukarnissallutik.
Ataatsimiititaliami ilaasortat marlunngornermi Savalimmiunit Tunumut Mestersvigimukariarlutik Nuummukassapput.
Allattoq Inge S. Rasmussen
septembarip 20-at 2016 06:53
Nutserisoq Mads Lynge
Aaja Chemnitz Larsen Inuit Ataqatigiit, ataatsimiititaliap siulittaasua Rasmus Jarlov, Konservativeneersoq aammaa Kalaallit Nunaat pillugu ataatsimiititaliami siulittaasoq Marcus Knuth Venstre angalanermi ilaatigut peqataassapput.
Folketingimi politikerit Nuummiinnerminni Issittumi sakkutooqarfik pulaassavaat , Inatsisartut Nunanut allanut- Sillimaniarnermullu ataatsimiititaliaa ataatsimeeqatigineqassaaq.
Nuumeereerunik tunup avannaanut Station Nordimut tikeraassapput tassani ilisimatuut misissuiviannut Villum Research Stationimukassallutik.
Ataatsimiititaliaq Danmarkimut uteriartornermini Kangerlussuarmi illersornissamut sinniisut pulaassavaat.
Illersornissamut ataatsimiititaliaq septembarip 22-ani sisamanngornermi Danmarkiliaqqissaaq.
