Folketingimut qinersineq: Sorlermi najugalittut nalunaarsimanerit takoqqaaruk
Inuit nalunaarsorneqarsimaffianni sumi najugalittut nalunaarsimaneq apeqqutaavoq allakkatigut qinersinermi kikkut taasinnaanissaannut. Taamatut aalajangersakkami pineqarput kalaallit Danmarkimi najugallit kiisalu qallunaat savalimmiormiullu Kalaallit Nunaanni najugallit. Naalagaaffiup sinniisaa taama KNRimut nalunaarpoq.
- Allakkatigut taasisinnaaneq ammareerpoq, allakkatigullu taasinermi allanneqassaaq partiip Folketingimut qinigassanngortitsisup aqqa, imaluunniit qinigassanngortittup aqqa tassanilu partiip tunuliaqutaata aqqa ilanngunneqarsinnaavoq, Naalagaffiup sinniisoqarfia ilisimatitsivoq.
Allakkatigut taasinissamut malittarisassat aalajangersimaqqissaartuupput. Kalaallit ilinniagaqartut Danmarkimi inuit nalunaarsorsimaffianni allassimasut qallunaat qinigassanngortitaannik taasisussaapput. Namminersorlutik Oqartussat Københavnimi aallartitaqarfiat KNR-imut taama ilisimatitsivoq.
Aammali kalaallit ilaat ilinniarnermut atatillugu utaqqiisaagallartumik Danmarkimiittarput inuit nalunaarsorsimaffiat malillugu nunatsinni najugalittut allassimasut.
- Taakku Danmarkimi najukkaminni kommunep allaffiani borgerservice-imut saaffiginnissapput tassanilu allakkatigut qinigassanngortittoq imaluunniit partii qinerlugu, Namminersorlutik Oqartussat Københavnimi aallartitaqarfianni paasissutissiisartoq Susan Frydendal KNR-imut ilisimatitsivoq.
Kalaallit ilaat aamma Danmarkimi napparsimmavinni inissiisarfinniluunniit najugaqarallarput inuillu nalunaarsorsimaffiat malillugu nunatsinni najugalittut allaqqallutik.
Nunamut namminermut aammalu peqqissutsimut ministeriaqarfik nalunaarummik ingerlatitseqqissaaq qinigassanngortittut aqqi nalunaarutigineqarpata paasissutissallu napparsimmavimmut inissiisarfimmulluunniit kalaallit najugaqarallarfigisaannut nassiunneqassapput. Taaneqareersutulli allakkatigut taasinissaq aallartereerpoq partiimut aalajangersimasumut taasiniaraanni.
Partiit Folketingimut qinigassanngortitsisut tassaapput Siumut, Inuit Ataqatigiit, Demokraatit aamma Atassut.
Qinigassanngortittut tassaapput:
Inuit Ataqatigiit: Sofia Rossen, Sara Olsvig, Johan Lund Olsen, Nikoline Ziemer
Siumut: Doris Jakobsen, Nick Nielsen, Vittus Qujaukitsoq, Akitsinnguaq Olsen
Demokraterne: Ane Lone Bagger, Niels Thomsen, Michael Rosing, Aviaaja Karlshøj Poulsen
Atassut: Hans Lyberth, Steen Lynge, Knud Kristiansen, Arnannguaq Blytmann