Folketingimut qinersineq KNR-imi
KNR-ip tamatuminnga juunip qaammataata ingerlanerani ikiorusuppaatit. Qineqqusaarneq qinersinerullu unnukkua malittarissavagut, qinersinermut atatillugu aallakaatitassiaqassalluni aammalu partiit qinigassanngortitaat oqallitsinneqassallutik.
Radiomi qinersineq pillugu immikkut aallakaatitassiaqassaaq, qinigassanngortittut qanimut sammineqartassallutik. Aallakaatitassiaq siulleq juunip ulluisa aappaanni unnukkut arfinermut qiteqquppat aallakaatinneqassaaq.
Aamma Nuummi kulturikkut illorsuarmi Katuami qinersisartunik ataatsimiititsineq toqqaannartumik aallakaatinneqassaaq. Partiit qinigassanngortitaqartut tamarmik immikkut marlunnik peqataatitaqassapput. Tamannalu juunip 13-iani ualikkut nalunaaqutaq marlunut pissaaq.
Qinigassanngortittut aamma apeqqarissaarfigineqassapput. Tamanna tv-kkut aallakaatitassiani juunip ulluisa qulinganni 15-ianilu pissapput.
Qinersineq naggaserlugu partiit siuttuisa naggataarutaasumik oqallitsinnerat juunip 17-iani aallakaatissavarput.
Ullormilu qinersiffiusumi, tassalu juunip 18-iani, qinersinerup unnukkua KNR1-kkut aallakaatinneqassaaq.
Radio qinersinerup unnukkuani nalunaaqutaq arfineq-pingasunit, immikkut ilisimasallit Folketingimullu qinigassanngortittut peqatigalugit radiop aallakaatitsivianit toqqaannartumik aallakaatitsissaaq.
Aallakaatitassiat qinersinermut tunngasut tamaasa KNR2-kkut toqqaannartumik nutserneqartarnissaat aamma anguniagaavoq.
