Politikki

URANI Urani pillugu Folketingimi tusarniaalersut

Folketingip Kalaallit Nunaannut tunngasunut ataatsimiititaliaa urani pillugu tamanut ammasumik tusarniaanissamut qaaqqusivoq.

Allattoq Helle Nørrelund Sørensen

marsip 04-at 2016 08:39

Nutserisoq Simon Uldum -

Danskit naalakkersuisuisa inatsisissatut siunnersuutinik marlunnik saqqummiussaqarnerat tamatumunnga pissutaavoq. Aappaa uranimik piiaanissamut, aappaalu uranimik Nunatsinnit annissuinissamut tunngassuteqarput. Inatsisissatut siunnersuutit Nunatta Danmarkillu urani pillugu isumaqatigiissutaannik toqqammaveqarput.

Immikkut ilisimasallit soqutigisaqartullu uranimik piiaanermik ilisimasallit assigiinngitsut tusarniaanermi saqqummiissapput. Nunatsinni uranimik piiaanissamut periarfissat naammassiniagassallu pillugit Danmarkimi Nunatsinnilu politikerit, suliniaqatigiiffiit allallu tusarniaatitsinikkut paasissutissanik pissarsiaqarnissaat siunertaavoq.

Aamma atuaruk Danskit partiivisa saamerliit uranimut isumaqatigiissut isumaqatigiinngissutigaat

Tusarniaaneq Folketingimi sisamanngornermi marsip 16-iani pissaaq peqataasussallu nalunaaqqaartussaapput, taamaattoq Folketingip nittartagaatigut Folketingillu tv-kkut kanaliatigut kikkulluunniit malinnaasinnaassapput.

Tusarniaaneq danskisuunerusoq ingerlanneqassasoq, Folketingimit ilisimatitsissutigineqarpoq.