Folketingimi amerlanerussuteqartut Pituffik pillugu isumaqatigiissut unitsikkallaqqugaat
Aviisi Jyllands-Posten naapertorlugu Exelis Services A/S-imut isumaqatigiissutup ukiuni arfineq-marlunni atuuttussap unitsikkallarneqarnissaa piumasaqaatigineqarpoq
Partiit talerperliusut, Enhedslisten partiilu pilersinneqaqqammersoq Alternativet isumaqarput nunanut allanut tunngasunut ministerip Martin Lidegaardip suliaq tamaat unitsikkallartariaqaraa. Tamanna pissaaq Naalagaaffeqatigiit USA-llu akornanni Pituffik pillugu politikkikkut isumaqatigiissutit malinneqalernissaasa tungaanut.
AAMMA ATUARUK Suliariumannittussarsiuussinermut malittarisassat nutaat Namminersorlutik Oqartussat ilisimaarisimavaat
Partiip Venstrep illersornissamut oqaaseqartartua, Troels Lund Poulsen, isumaqarpoq Thule air Basemut tunngatillugu nunat akornanni isumaqatigiissutaasut qanoq pingaaruteqartiginerat Danmarkip tungaanit erseqqissaatigineqartariaqartoq. Taamatummi pisoqarsimannginnasoraa, Nunanut allanut tunngasunut ministereqarfiup USA-p suliffeqarfiit suliariumannittussarsiuussinermi neqeroorniartut danskit ingerlatseqatigiiffinnut malittarisassaannik naammassisaqarnersut naliliiffiginiarlugu saaffiginnissuteqarnerani ikiuisinnaanani itigartitsisimammat.
- Naalagaaffeqatigiit soqutigisaat illersorniarlugit danskit tungaannit tamakkiisumik iliuuseqartoqarsimannginneranut uppernarsaatissat maanna takusinnaalerpagut. Taamaammat maanna oqaatigaarput aalajangiisoqannginnerani matumani suliaq unitsikkallarneqartariaqartoq, Troels Lund Poulsen Jyllands-Postenimut taama oqarpoq.
AAMMA ATUARUK Pituffik pillugu suliaq illuatungiliuttunit iluarineqanngilaq
Dansk Folkepartiimi siulittaasup tulliata Søren Espersenip suliaq aamma unitsikkallartariaqarsoraa.
- Anersaartorfissaqarnissarput pingaaruteqarpoq. Isumaqatigiissutip pitsaasumik naammassineqarnissaa amerikamiunit ilungersuutigineqarsimasoq aammalu danskit kalaallillu Thule Air Basemi sulisoriinnarnissaat anguniarneqartoq takusinnaavarput, sulialli ingerlatiinnarneqarneratigut suliffiit arlallit annaavissorneqarnissaat aarleqqutigaarput, Søren Espersen Dansk Folkepartiimeersoq aviisimut taama oqarpoq.
