FN: Syriami eqqissiviilliornerit sakkortusiartulersimapput

Syriami eqqissiviilliornerit sakkortusiartulersimapput, akiuukkunnaarallarnermullu isumaqatigiissummut aarlerinartorsiortitsillutik. Naalagaaffiit Peqatigiit immikkut aallartitaat, Syriamilu isumaqatigiissitsiniartartoq, Staffan de Mistura taama oqarpoq.
Allattoq Ritzau
apriilip 28-at 2016 15:44
Nutserisoq Ivik Kristiansen

- Ullut kingulliit marluk agguaqatigiisillugit minutsit 25-it qaangiukkaangata Syrimamiumik toqutaasoqartarpoq, minutsillu 13-it qaangiukkaangata ikiligaasoqartarluni, Staffan de Mistura oqarpoq.

Taanna nangilluni oqarpoq, akiuukkunnaarallarnermut isumaqatigiissut suli atuuteqqataraluartoq, qaquguluunniit atuukkunnaarsinnaasoq. 

Syriamilu eqqisseqatigiinnissamik Genevemi isumaqatiginninniarnerni malugineqarsinnaapput. Isumaqatiginninniarnerillu ingerlalluassappata akiuukkunnaarallarneq aallunneqartariaqartoq, Steffan de Mistura isumaqarpoq. 

Syriallu siunissaata USA-mit Ruslandimillu ingerlaannartumik oqallisigineqarnissaanik inassuteqarluni.

- Eqqisseqatigiinnissamik isumaqatiginninniarnerit aallartilluartut naammassilluarneqarnissaat Obamap Putinillu eqqaamaneqarnerannut pingaaruteqartupilussuupput, Naalagaaffiit Peqatigiit immikkut aallartitaat, Syriamilu isumaqatigiissitsiniartartoq Staffan de Mistura oqarpoq.

Taassumalu ilimagaa, Genevemi eqqisseqatigiinnissamik isumaqatiginninniarnerit majimi aallartinneqaqqissasut. 

Syriami akiuukkunnaarallarneq peqqarniisaarnianut, soorlu Islamisk Statimut atuutinngilaq.

 

    /ritzau/Reuters