Sunngiffimmi kapisilinniartarneq Aalisarnermut Naalakkersuisoqarfimmit inerteqqutigineqalissaaq
Sunngiffimmi kapisilinniartarnerup inerteqqutinngortinneqarnissaanik pilersaarut, sunngiffimmini kapisilinniartartup, Jonas Tobiassenip tamanna uggoraa.
- Uggornassaqaaq taamaaqqusaajunnaarsimagutta. Tamanna eqqarsarnalaarpoq.
Sunngiffimmini kapisilinniarnermik nuannarisaqartoq, Jonas Tobiassen Nuummioq taama oqarpoq.
Inuussutissarsiutiginagu nallullutik qassusersorlutillu kapisilinniaqqusaajunnaarnerannut pissutaavoq, Kalaallit Nunaat Atlantikup Avannaani kapisillit Piujuaannartinneqarnissaat pillugu Suliniaqatigiiffimmut, NASCO-mut isumaqatigiissuteqarmat ukiunut pingasunut atuuttussamik qilersorsimasumik.
Isumaqatigiissummi ilaatigut piumasaqaataalluni pisat nalunaarsornerisa pitsanngorsarneqarnisaaat pitsaanerusumillu tamassuma nakkutigineqarnissaa.
Tusarniaanermi - aalisarneq pillugu Isumalioqatigiisitamut aamma nassiussami, allassimavoq sunngiffimmi aalisartut aalisaqqusaajunnaarnissaat aamma inuussutissarsiutigalugu aalisartut kisimik tuniniaasinnaallutillu tulaassisinnaanisssaat siunnersuutaalluni.
Nuummioq sunngiffimmini Nuup kujataani Killuut Iluanni kapisilinniartartoq, Jonas Tobiassen oqarpoq, tamanna uggornartuusoq.
- Soorlu ukiornissaa eqqarsaatigalugu kapisilinnik pilisaratta taakku qerititsivitsinnut iliorarlugit ukiumut nerisassamaatigalugit iluartaqimmata. Tamanna eqqarsaatigalugu kapisilinniaqqusaajunnaarnissarput assut uggornassaaq assullu eqqarsarnarluni.
Sunngiffimmini kapisilinniartartoq, Jonas Tobiassen oqarpoq.
Kapisillit aggustip 15-anni aalisarneqarsinnaalerpata, sunngiffimmi aalisarneq inerteqqutaalersussaassaqo pilersaarutaavoq.
KNR-imit Naalakkersuisoqarfimmut sianerluta paaserusussimagaluarparput kapisilinniarneq inerteqqutaalissappat suut toqqammavigalugit tamanna aalajangersarneqarsimanersoq. Aalisarnermulli Naalakkersuisoqarfiup immikkoortortqarfiani pisortaq, Emanuel Rosing tamanna pillugu oqaaseqarusunngilaq.
