Finn Karlsen: Illoqqortoormiuni taasisukinnerussangareerpugut
Illoqqortoormiuni qinersinermi Atassutip taasisukinnerunissaa ilimagereerparput, taama Atassutip siulittaasua Finn Karlsen oqarpoq.
juunip 02-at 2009 18:28
Illoqqoortoormiuni Atassummik qinersisartut 80 procentimik ikileriarput, killoq IA siuariangaatsiarluni taasisai pingasoriaatinngortut.
Taasinerilli inerneri Atassutip siulittaasuata Finn Karlsenip tupaallaatiginngilai.
- Soorunami nuannerpallaanngilaq Atassut taasinikinnerummat, kisianni Illoqqoortoormiuni Atassummit qineqqusaartitaqannginnatta ilimagereerpara, Finn Karlsen oqarpoq.
Finn Karlsen isumaqarpoq Illoqqortoormiuni qinersinerup inernera nunap sinnerani Atassutip qanoq angusaqarnissaanik tikkuussisuunavianngitsoq.
- Nuummi inernerit Illoqqortoormiunisut issimasuuppata isumaga allaasimassagaluarpoq, Finn Karlsen Nuummi Inussivimmi qinersinerup matunerata kinguninngua oqarpoq.
