Finn Karlsen: Aalisariutit isaterneqarnissaannut aningaasaateqarluarpugut
Aalisariutit nutaanngilisut isaterneqartariaqaraluartullu uninngaannartut amerlavallaalersimapput. Aalisarnermut Naalakkersuisoq oqarpoq. Aalisariutaatillit aalisarsinnaanerminnut akuersissutitik annaasussaallugit paasigaangamikku qinnuteqaatiminnik utertitsiinnartarneri Finn Karlsenip tamatumunnga pissutaanerarpaa.
AAMMA ATUARUK Finn Karlsen tamanut tapiissuteqarnissamik neriorsuisimavoq
Aalisariutinut nutaanngilisunut isaterneqartussanullu aappaagumut aningaasaliissutigineqartussat Naalakkersuisunit peerneqarsimaneri pillugit, aalisarnermut naalakkersuisoq KNAPK-mit Radioaviisimi ippassaq isornartorsiorneqarpoq.
- Aalisarnermut naalakkersuisup ataatsimeeqatiginerani, taassuma nuannaarutigalugu oqaatigaa, kiisami aalisariutit nutaanngilisut isaterneqarneranni aalisartut aalisarsinnaanerminnut akuersissutaatitik annaasarunnaassagaat. Kisianni tassa maanna paasinarpoq, aningaasat tamassumunnga atugassat aappaagumit peerneqartussaalersimasut, KNAPK-p pisortaa, Petrus Biilmann Radioaviisimut ippassaq taama oqarpoq.
KNAPK-li paatsoorsimasoq, Aalisarnermut Naalakkersuisoq oqarpoq
- KNAPK-p nalunngilluinnaqqissaarpaa aamma ippassaani ataatsimiinnitsinni nassuiaappakka, aalisariutit nutaanngilisut isaterneqarnerisigut, aalisartut aalisarsinnaanerminnut akuersissutaasa annaaneqartannginnissaat pillugu inatsimmik allanngortitsinialersaartunga, tamannalu Inatsisartut ukiamut ataatsimiilerpata siunnersuutigisussaallugu oqaatigalugu, Finn Karlsen oqarpoq imalu nangilluni:
- Aalisariutit nutaanngilisut isaterneqarnissaannut aningaasat ukiumut katillugit 18 millionit koruunit tungaannut qinnutigineqartarput. Isaterneqartussanulli aningaasat ikittuinnaat tapiissutigineqartarput. Tamassumunnga pissutaaneruvoq, aalisartut paasigaagamikku aalisarsinnaanerminnut akuersissutitik annaasussaallugit qinnuteqaaatiminnik utertitsiinnartarneri, Finn Karlsen nassuiaavoq aamma oqaatigalugu KNAPK-p ataatsimeeqatiginerani aningaasaliinissamik neriorsuinnginnami.
AAMMA ATUARUK Savaatilinnut aningaasat millionerpassuit
- Aningaasaliinissamik immikkut ittunik KNAPK-mut tapiissuteqassallunga neriorsuinngilanga. Kisianni nassuiaappakka aningaasat atunngitsuukkat 30 millionit koruunit tungaannut amerlassusillit, inatsisit malillugit aappaagumut nuunneqartussaammata, taakkunanngaanniit qinnuteqartoqarsinnaasoq, Aalisarnermut, Piniarnermut Nunalerinermullu Naalakkersuisoq, Finn Karlsen taama naggasiivoq.
