Filmit nunatsinneersut pitsaanerulissapput

Tamannalu filmiliortartut silarsuaanni nuannaarutaaqisoq, film.gl-imi siulittaasoq oqarpoq. 

- Film.gl-imi siulittaasutut, nunatsinnilu filmiliornermik suliaqartut sinnerlugit nuannaaqaagut. Filmiliornermillu suliatsinnut assut nersualaarineruvoq. Soorunami nersualaarneqarluni suliassanut sukasaataaqaaq, neriuutigigaluarparput soorunami suli taperneqarnerussalluta, kisianni maannakkut aallarniutitut torraasorujussuuvoq, Pipaluk K. Jørgensen oqarpoq. 

Aamma atuaruk Kalaallinut filmiliortartunut aningaasaliissutit millionimik ilaneqartut

Naalakkersuisut filmiliorneq nunatsinni periarfissaalluartutut isigigaat, taanna isumaqarpoq.  

- Filmiliornermik suliaqarneq aningaasarsiornikkut siuariartortoq, nunatsinni aammalu nunani allani Naalakkersuisut paasisimagaat tapiinerminni takutippaat. 

Aamma atuaruk Lund Madsenip oqaatsitsinnik ilikkagaa siulleq tassaavoq 'usuk'

Naalakkersuisut filmiliornermut tapiissutigisartagaat agguaanneqartarput pingaarnertut kalaallit filmiliariniagaannut oqaluttualianut aamma filminut piviusulersaarutinut. Qinnuteqartunut piumasaqaataapput pikkorissuunissaq, pimoorussilluni ingerlatsisuunissaq, nunatsinnilu najugaqavissuunissaq, kultureqarnermut naalakkersuisoqarfik allappoq. 

Aamma atuaruk Angajoqqaajulluarneq pillugu filmiliaq nutaaq

1 million koruuninillu tapiineq filminut pitsanngorsaaqataassasoq Pipaluk K. Jørgensen isumaqarpoq.

- Filmiliatsinnut pitsanngorsaaqataassaqaaq, sivisunerusumik filmiliagut suliarisinnaalissavagut. Filmiliorneq ulluni marlunni sivisussuseqarneq-ajorpoq, immaqa ukiunik marluk pingasunik sivisussuseqartarpoq, aamma oqaluttualiorniaruit. Sivisuvoq akisullunilu, tapiissutillu iluaqutaassaqaat, Film.gl-imi siulittaasoq oqarpoq.

Aamma atuaruk Anders Lund Madsenip piviusulersaarutaa nuannaartitsivoq

Ukiumut ataasiaannarluni aningaasanik tapiiffigineqarnissamik qinnuteqartoqarsinnaavoq. Filmiliorniaraannilu tamanna ajornakusoortuusoq Pipaluk K. Jørgensen oqarpoq. Taamaammallu kultureqarnermut naalakkersuisumut Nivi Olsenimut allagaqarsimapput, ukiumut marloriarluni qinnuteqartoqartalersinnaanera anguniarlugu.

Kultureqarnermut naalakkersuisoqarfimmit oqaaseqartitsiniaraluaratta iluatsinngilarput.