Filmiliornermik pikkorissaanerit akeqanngitsumillu filmertitsineq
Ilitsersuisartup Ole Christian Madsenip filmiliai marluk filmiliortartut peqatigiiffiata Film.gl-ip takutinniarpai. Ilitsersuisartoq unnuk taanna najuutissaaq isiginnaariallu apeqquteqarfigisinnaassavaat. Filmiliai Steppeulven aamma Flammen og Citronen takutinneqassapput.
Filmit takutinneqarnerisa akornanni Film.gl-ip ukiumoortumik nersornaasiuttagaa Innersuaq, inummut suliffeqarfimmulluunniit Nunatsinni filmiliornermut ukiup siuliani immikkut sunniuteqarsimasumut tunniunneqassaaq.
AAMMA ATUARUK Filmiliortartut nunanit tamalaaneersut Kangerlussuarmi naapeqatigiilersut
Ilitsersuisartoq Ole Christian Madsen filmiliornermik pikkorissaaniarluni Nuummiippoq, pikkorissaaneq "Talented Greenland"-imik, tassalu "Kalaallit Nunaanni piginnaanillit"-mik, qulequtaqarpoq.
Pikkorissaarnerit januaarip 28-ani 29-anilu ingerlanneqassapput, ilaasortallu peqataaniarunik Film.gl aqqutigalugu nalunaarsinnaapput.
Unnukkut akeqanngitsumik filmertitsineq nersornaasiinerlu januaarip 28-ani pissapput aaqqissuussinerlu Katuap inersuaaraani nalunaaqutaq 17.00-imit aallartissalluni. Tamanut ammassaaq isernerlu akeqarani, aaqqissuisut Film.gl-imeersut taama nalunaarput.