VIDEO Filmi qiiaammisaarnartuliaq isiginnaarianit pitsaanerpaamik karakterilerneqartoq
Tallimanngornermi novembarip 21-anni sila taarpoq. Inuit 500-nik ikinnerunngitsut filmip qiiaammisaarnartuliap takuteqqaarnissaannut qaaqqusaareeramik Katuap inersuaani issiavinnut eqqissillutik ingitsitaaginnakaseqaat.
Filmi aallartiinnavissoq isiginnaartut nilliasaqattaartitaaginnavipput, sunaliuna filmimi nuannersumik ersigineqartoq.
Ikusissuaq ersinaqaaq. Pissanganartorujussuuvoq, isiginnaagassaqqeqaaq assut, Arnatsiaq Høyer oqarpoq.
Isiginnaariallu arlallit filmi nersualaarusullugu karakterileusullugulu tunuarsimaanngillat.
- Ilimaginngisannik takkuteriataartarami, tupannarsuaarluni qiiammernarlunilu, Sara Maria Grønvold oqarpoq, taassumallu filmi arfinilinnik karakterilerpaa.
Aamma atuaruk VIDEO Kalaallit qiiaamminartuliaat piariilersoq
- Killorneri, nipilersuutit atorneri nipaalleriataartarneralu quilertanartorujussuarmik katitersimagamikkit, Alex Nordal Andersen oqarpoq, namminerlu ulloriaasanik tallimat arfinilillu akornanni filmi karakterilerpaa.
Aamma atuaruk Filmimi ersinartulersaarummi Ikusimmarik aallaavigineqarporlusooq
Filmimillu suliarinnillunilu aaqqissuussisuusoq isiginnaarianit qiiaammisitaaqattaaqaaq.
- Nilliaqaat assut. Nilliagaangamik uanga qiiaammertarama, qiiaammeqattaaqaanga massakkut, Malik Kleist oqarpoq.
