Filmfestivali nunatsinnut tunngasoq Nunani avannarlerni angalaalerpoq

Greenland Eyes International Film Festival ukiaru nunanut avannarlernut filminik 40-nik takutitsiartorluni angalaartussap pilersaarutai inissipput.
apriilip 15-at 2014 09:37

Greenland Eyes suliniutaavoq Berlinimi 2012-imi aallartinneqartoq, taamani filmit 18-it Nunatsinnut tunngasut Nunatsinneersullu filmertarfimmi Arsenalemi takutinneqarput. Filminik takutitsineq assut nuannarineqarpoq, aaqqissuisorlu Ivalo Frank, filmiliortartoq, aalajangerpoq tamanna ingerlateqqikkusullugu.

Greenland Eyes 2014 filmfestivaliussaaq angalaartoq, Katuami aggustip 28-ani aallarnerneqartussaq, Katuameereeruni Danmarkimut, Savalimmiunut, Islandimut, Sverigemut, Finlandimut Norgemullu angalaarunneqassaaq.

Pilersaarutaavoq filmit 40-t Kalaallit Nunaanneersut Kalaallit Nunaannulluunniit tunngasut, nutaat nutaanngitsullu, assigiinngitsunillu suleriaasillit takutinneqassasut. Filmit takutinneqaleraangamik ilisaritinneqaqqaartassapput, apeqquteqarfigisinnaasallutillu.

Filmertitsinerup saniatigut tusarnaartitsisoqartassaaq, assilisanik saqqummersitsisoqarluni Nunanilu avannarlerni ilisimatusarfinni ataatsimeersuartoqarluni. Ilaatigut Nive Nielsen & The Deer Children Københavnimi Oslomilu festivalertoqarnerani tusarnaartitsissapput.

Pilersaarut tamakkiisoq suli naammassineqanngilaq, Greenland Eyesimillu aaqqissuisut filminik assigiinngitsunik nassinneqarnissartik soqutigaat. Uunnga nassiussisoqarsinnaavoq: submit@greenlandeyes.com

Pilersaarut

Kalaallit Nunaat – Nuuk: Katuaq aamma Ilimmarfik
28. august – 3. september

Danmark – København: Det Danske Filminstitut, Nordatlantens Brygge, Københavns Universitet
18. - 24. september

Savalimmiut – Torshavn: Det Nordiske Hus
5. - 9. oktober

Sverige – Stockholm: Bio Rio
6. - 10. november

Finland – Inari: Sameparlamentet
20. - 27. november

Norge – Oslo: Det Norske Filminstitut
11. - 18. december

Paasissutissat annertunerusut uani atuarsinnaavatit: http://www.greenlandeyes.com/