Nuummi bussit unittarfiisa ilaat atorunnaarsinneqalersoq
Bussit Nuummi illoqarfiup qiterpasissuani neriniartarfiup Charoen Pornip eqqaani unittarfiat inunnut biilertunullu ulorianartutut nalilerneqarluni atorunnaartussanngorpoq. Nuup Bussiisa Facebookimi qupperneranni taama allassimasoqarpoq.
Allattoq Mads Lynge
novembarip 10-at 2017 16:09
Bussit unittarfiata Thailandimiut neriniartarfiutaata Charoen Pornip silataaniittoq ulorianarsinnaasoq ilisimaneqarpoq, biilertut allat, ilaasut taxallu akornanni ulorianartoqarsinnaalluni. Biilerpassuit Aqqusinersuarmi ingerlasarput, bussit saavanni tunuannilu, soorlu biilit bussit uninngasut iloqqullugit aamma ingerlasinnaasartut. Nuup Bussiisa taamaammat unittarfiup taassuma atorunnaarnissaa kissaatigisimavaat.
- Siunissami pisinnaasut ulorianarluarsinnaasut pinaveersaarusuppagut, taamaammallu unittarfiup atorunnaarnissaanut qinnuteqarsimavugut, tamannalu kommunimiit akuerineqarpoq. Unittarfik Kommuneqarfik Sermersuup saavaniittoq innersuussutigaarput. Nuup Bussii Facebookimi taama allapput.
