Faglitterær konference debuterer i Nuuk
Isumasioqatigiinneq peqatigiiffimmit Kalaallit Atuakkiortunit, KA, danskit suliat pillugit atuakkiortartut peqatigiiffiat, danskit atuakkiortut kattuffiata ataaniittoq suleqatigalugu aaqqissuunneqartoq septembarip 27-anit 30-ata tungaanut ingerlanneqassaaq.
Nunani avannarliit suliat pillugit atuakkiortartuisa sinniisaat siullerpaamik Nunatsinni isumasioqatigiissapput, taamaammat periarfissaq taanna iluatsillugu aaqqissuisut Nunatta oqaluttuassartaanik kulturianillu peqataasut oqaluttuunniarpaat.
Paasissutissat
Eskimologip aamma Kalaallit Atuakkiortut peqatigiiffianni siulittaasup, Juaaka Lyberthip, Kalaallit Nunaata oqaluttuassartatoqaa saqqummiutissavaa, kiisalu atuakkiamik TV-kkullu piviusulersaarummik ”Aaannat alannguanni – nunatta politikkikkut ineriartornera 1939 - 1979”-imik atuakkiortup isiginnaagassiortullu Tupaarnaq Rosing Olsenip, nunatta oqalittuassartaa nutaanerusoq saqqumiutissallugu.
Isumasioqatigiinnermi inuit 27-t peqataassaapput, nunani avannarlerni suliat pillugu atuakkiortartut peqatigiiffiinit tamaneersut.
Nunani avannarlerni suliat pillugit atuakkiortarnerup ineriartornera isumasioqatigiinnermi pingaarnertut sammineqassaaq, ilanngunneqassallutillu nunani inukitsunnguani, oqaatsinik ikittuinnarnik atuiffiusuni, suliat pillugit atuakkiortarnermi periarfissat, pingaartumik nunatsinni Saamillu nunaanni periarfissat eqqarsaatigalugit.
Atuakkiortoq, siornatigullu ICC-mi præsidentiusimasoq, Aqqaluk Lynge, suliat pillugit nunatsinni atuakkiortarnerup ineriartornera saqqummiutissavaa, atuakkiortullu Saamit nunaanneersup Siri Broch Johansenip saamit oqaasii, kulturiat aamma suliat pillugit atuakkiortarnerat oqaluttuarissavai.
Digitalimik atuakkioriaatsini unammilligassat, saqqummersitsisarnernut periarfissat tuniniaasarnerlu, aamma oqaatsini ikitsunnguanik atuiffiusuni digitalimik atuakkiortarnermi qanoq pisoqartarnersoq isumasioqatigiinnermi aamma sammineqassapput.
