Politimesteri: Facebookikkut pisiniaraangavit mianersortassaatit
Teknologip Nunatsinni ineriartornera ilutigalugu qarasaatiatigut peqquserlunnerit amerliartorput inuillu peqquserluttoqartarneranut maluginiagaqarnerulerlutillu pisoqaraangat unnerluutiginninnerulersimapput. 2016-imi peqquserlunnerit ukiup siulianut sanilliullugit 94 procentimik amerleriarsimaneranut politimesteri taama eqqoriaakannerpoq.
AAMMA ATUARUK Peqquserlunnerit amerleriarujussuartut
- Sooq amerleriarsimanersut qulakkeerlugu oqaatigisinnaanngilara. Inuit peqquserluttoqartarneranut eqqummaarinnerulersimasoraakka, Bjørn Tegner Bay KNR-imut oqarpoq.
Qarasaasiatigut peqquserlunnerit tassaasinnaapput internetti aqqutigalugu nioqqummik pisineq pisiarli tikinngisaannartoq imaluunniit pitsaanngitsorujussuaq tikittoq. Taamali pisoqaraanngat politiit qanoq iliuuseqarsinnaanerat ilungersunarsinnaasarpoq.
- Peqquserluttut nunami allamiikkaangata politiinut ilungersunartarpoq. Politiit qanoq iliuuseqarsinnaasinnaanerat ajornakusoorsinnaavoq, Tegner Bay oqarpoq, inuillu nittartakkatigut pisiniaraangamik e-mik meqqilimmut nittartakkatigulluunniit niuerniartarfimmut tatiginartumut pisisarnissaannik kaammattorpai.
Qarasaasiatigut peqquserlunneq alla tassa Facebookimi gruppitigut soorlu Køb-Salg-Bytteni pisiniarmi sianiinaarisoqarsinnaammat.
- Taakkunani tuniniaasut amerlanerit unneqqarissuupput. Taamaakkaluartorli pisiniaraanni tuniniaasoq naapillugu arlaatigulluunniit nioqqutissamik tigusisinnaanissaq qulakkeeqqaartaqqunarpoq. Taamaaliornikkummi aamma nioqqutissat tillitanik pisinnginnissaq qulakkeerneqarsinnaavoq, politimesteri oqarpoq.
Akiliissutit mianersuuguk!
Taakku saniatigut nittartakkatigut piniarnermi akiliissutip paasissutissartai mianersuussassaapput.
- Pinerluttup pisinnaatitaanani allap akiliissutaa atorlugu nittartakkatigut pisissutigisimagaa – assersuutigalugu tusassimik immiinernut, sulianik taamaattunik arlalinnik suliaqarpugut. Akiliissut nammineq pisiarinngisamut pisinnaatitaanngitsumit atorneqartoq paasigaanni piaartumik aningaasaateqarfimmut saaffiginnipallannissaq pingaaruteqarpoq – nittartakkatigut pisiniarfiit amerlanertigut annaasaqaatinik taarsiisussaatitaapput, Bjørn Tegner Bay KNR-imut oqarpoq.
