Facebook qineqqusaartarfiuvoq nutaaq

Facebook politikkikkut sumiissusersiutitut atuukkumaartoq, inuit attaveqaataat pillugit ilisimatusartoq isumaqarpoq. Facebook aamma Twitter 2007-mi qinersinermut sanilliullugu atorneqarnerujussuanngoreerput.
Allattoq Noah Mølgaard
aggustip 29-at 2011 12:53

Kalaallit Folketingimut qineqqusaartut Facebook atorlualereerpaat tassuunga politikkikkut oqariartuutinik siammarterisaramik. Kalaallilli politikkerit ikittuinnaat Twitter atorpaat, illuanillu qineqqusaartut Facebookimik atuisut parteeqataallu statusiminnik nutarteriuarput.

Facebook kalaallit inuunerannut ilaalluinnalereerpoq linkit assillu ullormut ikkussorneqartarlutik. Politikkerit atuisut ilagilluinnarpaat taakkumi allaaserisat KNRip nittartagaanut Sermitsiaq.AG-llu nittartagaanut ikkunneqartut imminnut tunngasuugaangata linkertarpaat.

Facebook 2004-mi siullerpaamik atorneqalerpoq ullumikkullu kalaalerpassuit tassannga atuisuupput. Taannalu inuit attaveqartarfiat attaveqariaatsinik nutaalianik inerisaajuarpoq. Tamakku ilagaat badges-inik taaneqartartut atuisutut assimut akkiunneqarsinnaasut tassuunalu nalunaarlugu partii sorleq tapersersornerlugu. Aamma eqimattaliornissamut periarfissaqarpoq aalajangersimasumik isummersortut tassani oqallittarfinnik pilersitsiortortarmata.

- Suliffeqarfiit minnerunngitsumillu partiit Facebook siunertanut aalajangersimasunut atortarpaat. Taannalu ullutsinni politikkikkut sakkut ilagilluinnalersimavaat, Lars Holmgaard Christensen Danmarks Journalist- og Mediehøjskole-mi tusagassiutit nutaat pillugit ilisimatusarnermi pisortaq KNR-imut oqarpoq.

Taanna isumaqarpoq politikkerit ilisimaneqannginnerit isumamminnik nittartaassinissaannut tassani periarfissaqalersut. Aamma tusagassiortut tusagassiorfinni assigiinngitsuneersut Facebook atorlugu politikkerit akornanni susoqarneranik tipisiuisarput.

- Atuisut assiinngitsut allataannut oqaaseqaatit politikkikkut nalornisunut sumiissusersiutitut atorsinnaapput, Lars Holmgaard Christensen oqarpoq.

- Nalornisut kammalaatimik isummersuutaat atuarsinnaavaat taamaasillutillu paasiartorlugu qineqqusaartoq sorleq tapersersorusunnerlugu. Tamakku aqqutigalugit qineqqusaartut taasisussaminnik pissarsisinnaapput, Lars Holmgaard Christensen oqarpoq.

Nittartakkanik alaatsinaalluni nittartakkap Alexap paasissutissaatai naapertorlugit Facebook nunarsuarmi takusarneqarnerni tullersortaavoq Google-imit taamaallaat qaangerneqarsimalluni.