Facebook Odensemi paasissutissanut katersuivissualiortoq
Amerikamiut IT-mik suliffeqarfissuat Facebook, Danmarkimi oqartussat peqatigalugit ukiuni pingasuni isertortumik piareersaateqareerlunilu Odensemi paasissutissanik katersuivissuarmik 55.000 m2-isut angitigisumik pilersitsisussanngorpoq.
Allattoq Inge S. Rasmussen
januaarip 19-at 2017 07:34
Nutserisoq Simon Uldum -
Applelip Viborgimi 2015-imi paasissutissanik katersuiviliornerminut milliardinik arlalinnik aningaasaaliinerata kingorna taama aalajangiisoqarpoq, Danmarkillu nunarsuarmi paasissutissanik katersuiveqarnermut pilerinartuuneranik nukittorsaassaaq, danskit nunanut allanut tunngasunut ministeriat Anders Samuelsen naammagisimaarinnilluni tusagassiorfinnut nalunaaruteqarluni taama allappoq.
Facebookip aalajangernera Danmarkip Europap avannaani paasissutissanik katersuiveqarnermi qitiusumik inissisimalernissaminut periarfissaanik nukittorsaataassasoq danskit naalakkersuisuisa naatsorsuutigaat.
