PITUFFIK Exelisip pisoq ajuusaarutigaa
Suliffeqarfiup Pituffimi kiffartuussisussatut eqqartuussivimmit inissinneqarmat, suliariumannittussarsiuussinerlu inatsisitigut tunngavissaqarluarmat, sulinissaminnut aallartilluarsinnaanngorput.
- Pisarissersuisoqarani sulineq ingerlaannaq aallartissimasuuppat tamanut iluaqutaasimassagaluartoq isumaqarpugut, Exelis Servicep oqaaseqartartua Kim Ruberg oqarpoq.
Aamma atuaruk Pituffik pillugu suliaq aalajangiiffigineqartoq
Suliariumannittussarsiuussinermili ajorsartut, ilaatigut kiffartuussinissamik isumaqatisiissummik ullumi piginnittup Greenland Contractorsip, suliariumannittussarsiuussineq naammagittaalliuutigaat.
Siullermillu naammagittaalliuteqartut Exelisip suliariumannittussarsiuussinermi piumasaqaatit naammassinninnginneranik naammagittaalliuutaat eqqartuussivimmit isumaqatigineqarpoq, taamaammallu suliariumannittussarsiuusseqqittoqartussanngoraluarluni.
Taamatulli aalajangerneq eqqartuussivimmit annerusumit junimi atorunnaarsinneqarpoq. Tamannalu Exelisimit nuannaarutigineqarpoq.
- Nalunngilarput pitsaasumik, inatsisitigut tunngavissaqarluartumik killissarititaanillu malinnittumik neqerooruteqarluta, Kim Ruberg oqarpoq.
Aamma atuaruk PITUFFIK Qujaukitsoq: Eqqartuussinermi aalajangiineq atuaqqissaarneqassaaq
Suliariumannittussarsiuussinermili piumasaqaatit ajorluinnartut Greenland Contractorsimit isumaqartoqarpoq, tamannalu USA-mit Danmarkimit minnerunngitsumillu Naalakkersuisunit isumaqatigineqaraluarluni.
Taamaammat iluarsiinissaq politikerinit akisussaaffigineqartoq, Greenland Contractorsimit isumaqartoqarpoq.
Exelissimiilli suliariumannittussarsiuusseqqittoqaraluarpat qanoq qisuariarnissartik, taarsiivigineqarnissaminnullu piumasaqassanerlutik suli aalajanginngilaat.
- Taanna maannakkut piviusorpalaannginnami akiuminaatsippara. Suliariumannittussarsiuussinermi uani ajugaanerput sulinitsinni soorunami aallaavigissavarput.
- Ajunngitsumik naapertuilluartumik eqqortumillu suliariumannittussarsiuussinermi ajugaasugut eqqartuussiviup aalajangerneranit uppernarsarneqarpoq, Exelis Servicep oqaaseqartartua Kim Ruberg oqarpoq.
Aamma atuaruk PITUFFIK Sulisut atugaat ajornerulissanngitsut
