Exelisip kiffartuussinissamik isumaqatigiissutaata sivikillisarneqarnissaa Lidegaardip sulissutigaa
Christiansborgimi matoqqasumik isumasioqatigiittoqareersoq nunanut allanut tunngasunut ministeri taama nalunaarpoq.
- Sullissisussatut isumaqatigiissut amerikami inatsisit atuuttut tunngavigalugit atorunnaarsinneqarsinnaanngilaq. Oqaannartoqarsinnaanani sullissisussarsisimanngittoq isumaqatigiissullu atorunnaarsillugu. Isumaqatigiissutilli atuunnera sivikillineqarsinnaavoq, ukiunut arfineq marlunnut atuuttussaq, iluatitsinikkut allaat ukiumut ataatsimut appartinneqarsinnaalluni.
Aamma atuaruk Pituffik pillugu isumaqatigiissut atorunnaarallartinneqassanngilaq
- Pissutsit assigiinngitsut apeqqutaapput, taamaaliortoqarsinnaanersoq piumasoqarnersorlu. Tamakkulu isumaqatigiinniarnernut ilaapput, nunanut allanut tunngasunut ministeri Martin Lidegaard ullaaq taama oqarpoq.
Kinguneqartussamik oqaloqatigiinnerit
Kalaallit danskillu atorfilittaasa sapaatip akunnerata siuliata qiteqqunneranili Washingtonimi amerikamiut isumaqatiginiarsimavaat. Isumaqatigiinniarnerit maannamut marlunnik suleqatigiisitaliornernik kinguneqarsimapput, Exelis Servicemut isumaqatigiissut naappat sullissisussarsioqqinnissap isikkussaanik misissuisussat.
- Kinguneqartussamik amerikamiut oqaloqatigaagut kalaallit naalakkersuisuilu qanittumik suleqatigalugit. Amerikamiullu ippassaq suleriaasissamik isumaqatigiissuteqarfigaavut marlunnik suleqatigiisitaliorluta, piaartumik illuatungeriinnut naammaginartumik aqqiissusiortussanik.
- Suleqatigiisitap siulliup piaartumik nutaamik sullissisussarsiornissaq isumagissavaa, erseqqissarlugulu qallunaat-kalaallillu suliffeqarfiutaat suunersut, kukkuneq uteqqinneqassanngimmat. Neriuppunga ataatsimiisitaliat sulinissartik ullut arlaqanngittut qaangiuppata aallartissagaat, tamarmillu naammagisinnaasaannik isumaqatigiissusiorlutik.
Aamma atuaruk Nunanut allanut tunngasunut ministereqarfik atorfilittanik Pentagoniliartitsisoq
"Aningaasatigulli Kalaallit Nunaannut ajornaasaarnissamik" taasaq ministerip itisilerusunngilaa.
- Isummat ulusissallu aningaasanut tunngasut pillugit maannakkorpiaq oqaaseqarsinnaanngilanga. Suli tamaanga killinngilagut, Martin Lidegaard oqarpoq.
