VIDEO Exelisip aalajangiiffigineqarnera Vittup periarfissanik nutaanik ammaassisinnaassanasoraa
Taamaattorli Inuussutissarsiornermut, suliffeqarnermut, niuernermut nunanullu allanut naalakkersuisup tamanna allaganngorlugu takoqqaarusuppaa.
- Suliaq pissanganartumik ineriartorfiuvoq, peqatigisaanilli aamma tupaallannartuunani.
- Sakkutooqarfiup kiffartuunneqarnerata suliariumannittussarsiuunneqarnerani piumasaqaatit atuutsinneqarsimanerinut tunngatillugu, nunatsinnit aallaqqaataaniilli oqaatigaarput suliassap Exelis Servicesimut tunniunneqarnera kukkunerusoq. Eqqartuussiviullu aalajangiineratigut suliariumannittussarsiuussineq aallaqqaataaneerneqassappat tamanna nuannaarutigissavarput. Tamannali isumaqanngilaq suliaq tamaanga killeqartoq, KNR-imut taama oqarpoq.
Aamma atuaruk Lidegaardip Pituffik pillugu aalajangiisoqarnera nersualaaraa
Isumaqatigiissut atuuttoq ungasinngitsukkut atorunnaassaaq
Pituffimmi kiffartuussinissamik isumaqatigiissut atuuttoq oktobarip aallaqqaataani atorunnaartussaavoq, tamatumalu kingorna sakkutooqarfiup kimit qanorlu kiffartuunniarneqarnersoq ilisimaneqanngilaq.
- Eqqartuussiviup aalajangernera inatsisitigut, aningaasatigut politikkikkullu qanoq kinguneqartitsissanersoq nalilersuiffigeqqaassavarput, taamaammat eqqartuussiviup aalajangernerani piumasaqaataasut pissangalluta utaqqimaassavagut, tamatumalu kingorna qanoq sunniuteqarnissaa pillugu oqaaseqarfigisinnaassallutigu, Vittus Qujaukitsoq taama oqarpoq..
Taamaammat suliarimannittussarsiuusseqqinnermi Greenland Contractorsimut isumaqatigiissutaasoq sivitsorneqassanersoq Naalakkersuisup aamma akisinnaanngilaa.
- Naalakkersuisut akuliutsinneqassapput, tamatumalu kingorna Inatsisartut nunanut allanut sillimaniarnermullu ataatsimiititaliaat suliamut akulitsunneqarlutik, tamannalu pereerpat danskit naalakkersuisui taamatullu amerikamiut suliap qanoq ingerlariaqqinnissaanut akuliutsinneqassapput, Vittus Qujaukitsoq taama erseqqissaavoq.
Aamma atuaruk Pituffimmi kiffartuussinissamik isumaqatigiissut Exelis Servicesip annaavaa
Aningaasaqarnermut pingaaruteqarluinnarpoq
Amerikami eqqartuussiviup aalajangiinerata nunatsinnut periarfissanik ammaassisinnaanera neriuutigineqarpoq.
- Ilisimaneqareersutut, Pituffik nunatta aningaasaqarnernut pingaaruteqartupilussuuvoq, taamaammat suliami misissugassat tamaasa misissorneqartariaqarput.
- Nunatta karsia Pituffimmut atatillugu annaasaqaateqassanngilaq, aamma suliffissaqarnissaa taamatullu nunatta karsianut akileraarutitigut isertitaqarnissaq qulakkeerniassavarput. Taamaammat Pituffik erseqqilluinnartunik soqutigisaqarfigaarput, Vittus Qujaukitsoq taama oqarpoq.
Greenland Contractors I/S-ip suliffeqarfiit Per Aarslef A/S aamma Copenhagen Arctic A/S peqatigalugit Pituffimmi sakkutooqarfimmi kiffartuussinissamik isumaqatigiissutip suliarimannittussarsiuunneqarnera amerikami eqqartuussivimmut Court of Federal Claimsimut naammagittaalliuutigaa. Naammagittaalliuutaalu tassannga ilalerneqarpoq.
Aamma atuaruk Sara Olsvig Pituffik pillugu: Illersornissamut isumaqatigiissutit isumaqatigiinniutigeqaqqittariaqarput
